ముంబైలో మళ్లీ 90ల నాటి భయం.. టైగర్ ష్రాఫ్‌ తర్వాత ఎవరు?.. భయంభయంగా బాలీవుడ్

బాలీవుడ్ నటుడు టైగర్ ష్రాఫ్ కారుపై జరిగిన కాల్పుల ఘటనపై చిత్ర పరిశ్రమ తీవ్రంగా స్పందించింది. ఆల్ ఇండియా సినీ వర్కర్స్ అసోసియేషన్ (ఏఐసీడబ్ల్యూఏ) ఈ దాడిని తీవ్రంగా ఖండించింది. ఇది కేవలం ఒక వ్యక్తిపై జరిగిన దాడి కాదని, మొత్తం సినీ పరిశ్రమను భయభ్రాంతులకు గురిచేసి, డబ్బులు గుంజేందుకు జరుగుతున్న వ్యవస్థీకృత ప్రయత్నమని ఆరోపించింది. "ఈరోజు టైగర్ ష్రాఫ్.. మరి తరువాత ఎవరు?" అంటూ తీవ్ర ఆందోళన వ్యక్తం చేసింది.

ఆదివారం జరిగిన ఈ ఘటనపై ఏఐసీడబ్ల్యూఏ ఎక్స్ వేదికగా ఒక ప్రకటన విడుదల చేసింది. ముంబై లాంటి నగరంలో ఒక ప్రముఖ నటుడికే భద్రత లేకపోతే, సామాన్యుడి పరిస్థితి ఏంటని ప్రశ్నించింది. గతంలో సల్మాన్ ఖాన్ ఇంటి బయట కాల్పులు, సైఫ్ అలీ ఖాన్ ఇంట్లో కత్తిపోట్లు, రోహిత్ శెట్టి నివాసం దగ్గర కాల్పులు, కపిల్ శర్మ కేఫ్‌పై వరుస దాడులను ఈ సందర్భంగా గుర్తుచేసింది. ఇవన్నీ ఒక పద్ధతి ప్రకారం జరుగుతున్నాయని, బాలీవుడ్‌ను భయపెట్టి దోచుకోవడమే ఈ గ్యాంగుల లక్ష్యమని పేర్కొంది. కొన్ని ముఠాలు బాహాటంగానే బాధ్యత తీసుకుంటున్నా, వారి నెట్‌వర్క్‌లను అరికట్టడంలో యంత్రాంగం విఫలమవుతోందని ఆవేదన వ్యక్తం చేసింది.

ముంబై వీధులు మళ్లీ 90ల నాటి అండర్‌వరల్డ్ రోజుల మాదిరిగా రక్తమోడుతున్నాయని, భయం నీడలో బాలీవుడ్ పనిచేయదని స్పష్టం చేసింది. ఈ నేపథ్యంలో మహారాష్ట్ర ముఖ్యమంత్రి, హోంమంత్రి దేవేంద్ర ఫడ్నవీస్ ముందు ఐదు ప్రధాన డిమాండ్లు పెట్టింది. దాడి వెనుక ఉన్న సూత్రధారులను వెంటనే అరెస్టు చేయాలని, దోపిడీ నెట్‌వర్క్‌లను కూకటివేళ్లతో పెకిలించాలని కోరింది. సినీ ప్రముఖులకు, వారి కుటుంబాలకు తగిన భద్రత కల్పించాలని, శాంతిభద్రతల పరిరక్షణలో విఫలమైన అధికారులపై చర్యలు తీసుకోవాలని డిమాండ్ చేసింది. కేవలం ప్రకటనలు సరిపోవని, బాలీవుడ్‌కు నిజమైన రక్షణ కావాలని తేల్చిచెప్పింది.

ఆదివారం సాయంత్రం జుహూలోని పుష్పా పార్క్ సమీపంలో టైగర్ ష్రాఫ్ తన బీఎండబ్ల్యూ కారులో వెళ్తుండగా దుండగులు ఐదు రౌండ్లు కాల్పులు జరిపారు. ఈ ఘటనలో టైగర్ కుడి చేతికి గన్‌పౌడర్ వల్ల గాయాలయ్యాయి. అతని డ్రైవర్ ఫిర్దాస్‌, ఓ ఆటో డ్రైవర్ కూడా గాయపడ్డారు. ఘటన అనంతరం మహారాష్ట్ర ఉప ముఖ్యమంత్రి ఏక్‌నాథ్ షిండే టైగర్‌ను పరామర్శించి, ముంబైలో ఇలాంటి గ్యాంగులను ఉపేక్షించబోమని హామీ ఇచ్చారు. ప్రస్తుతం పోలీసులు ఈ కేసుపై దర్యాప్తు చేస్తుండగా, ఒకరిని అదుపులోకి తీసుకుని విచారిస్తున్నారు. లారెన్స్ బిష్ణోయ్ గ్యాంగ్ పేరుతో సోషల్ మీడియాలో వచ్చిన పోస్టులపైనా ఆరా తీస్తున్నారు.