‘ఆయన ఓడితే ఇరాన్‌తో మేం పోరాడం'.. ఇజ్రాయెల్ ఓటర్లకు ట్రంప్ స్ట్రాంగ్ వార్నింగ్!

ఇజ్రాయెల్‌లో పార్లమెంట్ ఎన్నికల వేడి తారాస్థాయికి చేరిన వేళ, అమెరికా అధ్యక్షుడు డొనాల్డ్ ట్రంప్ అనూహ్యంగా రంగంలోకి దిగారు. అక్టోబర్ 27న జరగనున్న ఎన్నికలకు కేవలం తొమ్మిది రోజుల ముందు, ప్రస్తుత ప్రధానమంత్రి బెంజమిన్ నెతన్యాహుకు తన "సంపూర్ణ, పూర్తి మద్దతు" ప్రకటించారు. నెతన్యాహును 'గొప్ప యోధుడు'గా అభివర్ణించిన ట్రంప్, తప్పుడు నేతను ఎన్నుకోవద్దంటూ ఇజ్రాయెల్ ప్రజలకు గట్టి హెచ్చరిక జారీ చేశారు.

ఆదివారం తన సోషల్ మీడియా ప్లాట్‌ఫామ్ 'ట్రూత్ సోషల్'లో ఇజ్రాయెల్ ప్రజలను ఉద్దేశించి ట్రంప్ ఒక సందేశం పోస్ట్ చేశారు. "ఇరాన్‌కు వ్యతిరేకంగా అమెరికాతో కలిసి నిలబడిన బలమైన, ధైర్యవంతుడైన, తెలివైన నేత నెతన్యాహు. ఒత్తిడిలో ఆయన మరింత బలపడ్డారు. ఇప్పుడు జరగబోయే ఎన్నికల్లో నెతన్యాహు కాకుండా మరెవరు గెలిచినా, అమెరికా ఇరాన్‌తో ఒంటరిగా పోరాడాల్సి వస్తుంది. అలా చేయడానికి నేను సుముఖంగా లేను" అని ట్రంప్ స్పష్టం చేశారు. ఇరాన్ తన పంథా మార్చుకోకపోతే, త్వరలోనే తాము ఆ పని పూర్తి చేస్తామని కూడా హెచ్చరించారు.

ట్రంప్ మద్దతుపై నెతన్యాహు వెంటనే 'ఎక్స్' (ట్విట్టర్) వేదికగా స్పందించారు. "మీ అద్భుతమైన మద్దతుకు ధన్యవాదాలు. ఇద్దరం కలిసి ఈ లక్ష్యాన్ని పూర్తి చేద్దాం!" అని పేర్కొన్నారు.

అక్టోబర్ 7, 2023న హమాస్ జరిపిన దాడి తర్వాత ఇజ్రాయెల్‌లో జరుగుతున్న తొలి జాతీయ ఎన్నికలు ఇవే. గత ఏడు నెలలుగా ఇరాన్‌తో కొనసాగుతున్న సంఘర్షణ మధ్యప్రాచ్యంలో తీవ్ర నష్టాన్ని కలిగించింది. ఈ నేపథ్యంలో జరుగుతున్న ఎన్నికల్లో ఏ పార్టీకి స్పష్టమైన మెజారిటీ వచ్చే అవకాశం లేదని తాజా పోల్స్ సూచిస్తున్నాయి. ఇజ్రాయెల్‌లో సంకీర్ణ ప్రభుత్వాల ఏర్పాటు ద్వారానే ప్రధానిని ఎన్నుకుంటారు.

గతంలో ఇరాన్‌పై వ్యూహాల విషయంలో భేదాభిప్రాయాలు రావడంతో ట్రంప్ మద్దతుపై స్పష్టత ఇవ్వలేదు. అయితే, సరైన సమయం కోసం వేచి చూశానని, తన మద్దతు ఎప్పుడూ నెతన్యాహుకే ఉంటుందని ఆయన అన్నారు. ఈ పరిణామాల నేపథ్యంలో, నెతన్యాహు రాజకీయ ప్రత్యర్థులు గాడీ ఐసన్‌కోట్, నఫ్తాలి బెన్నెట్ వంటి నేతలు స్పందిస్తూ.. ఇజ్రాయెల్ ప్రధాని ఎవరో కేవలం ఇజ్రాయెల్ ఓటర్లు మాత్రమే నిర్ణయిస్తారని తేల్చి చెప్పారు. విదేశీ ఎన్నికల్లో నేరుగా జోక్యం చేసుకోవడం ట్రంప్‌కు కొత్తేమీ కాదు. అయితే, ఈసారి ఆయన మద్దతు ఎన్నికల ఫలితాలపై ఎంత ప్రభావం చూపుతుందో వేచి చూడాలి.