ఆ వీడియో నాలో ధైర్యం నింపింది.. సీఎం యోగిని పెళ్లికి పిలిచిన కేరళ యువతి

ఉత్తరప్రదేశ్ ముఖ్యమంత్రి యోగి ఆదిత్యనాథ్‌కు కేరళ నుంచి ఓ యువతి ప్రేమపూర్వక ఆహ్వానం పంపింది. తనను ఓ చెల్లెలిగా భావించి, తన పెళ్లికి వచ్చి ఆశీర్వదించాలని కోరుతూ భావోద్వేగభరిత లేఖ రాసింది. తనకు తెలియకుండానే తన జీవితంలో స్ఫూర్తిగా నిలిచిన యోగిని అన్నయ్యగా సంబోధిస్తూ, డిసెంబర్‌లో జరగనున్న తన వివాహానికి తప్పక హాజరుకావాలని విజ్ఞప్తి చేసింది.

కేరళకు చెందిన అరుంధతి అనే యువతి, శనివారం సీఎం యోగికి ఈ లేఖ రాసింది. "అత్యంత సంతోషంతో, గౌరవంతో నా జీవితంలోని అమూల్యమైన ఘట్టానికి మిమ్మల్ని ఆహ్వానిస్తున్నాను. డిసెంబర్ 20న కేరళలోని ఆలూవాలో రాహుల్‌తో నా వివాహం జరగనుంది. ఈ వేడుకకు మీరు తప్పక రావాలి" అని ఆమె లేఖలో పేర్కొంది.

సీఎం యోగి తనకెలా స్ఫూర్తిగా నిలిచారో అరుంధతి తన లేఖలో వివరంగా తెలిపింది. "చిన్నప్పుడు నేను ప్రతి చిన్న విషయానికి ఏడ్చేదాన్ని. భావోద్వేగంగా ఉండటం బలహీనత అని, మానసికంగా బలంగా ఉండాలని నా స్నేహితులు అనేవారు. దాంతో ఏడవడం సిగ్గుపడాల్సిన విషయంగా భావించసాగాను. సులువుగా ఏడ్చే నేను ఎప్పటికీ ధైర్యవంతురాలిని కాలేనేమో అని మథనపడేదాన్ని" అని ఆమె గుర్తుచేసుకుంది.

"ఒకరోజు నా కజిన్ బ్రదర్, మీరు (యోగి) ఒక కార్యక్రమంలో భావోద్వేగానికి గురై కన్నీళ్లు పెట్టుకున్న వీడియోను చూపించాడు. 'యోగి ఆదిత్యనాథ్‌లా ఉండాలి. భావోద్వేగంగా ఉండటం, ఏడవడం బలహీనత కాదు. నీ పనితోనే అందరికీ సమాధానం చెప్పాలి' అని నాతో అన్నాడు. ఆ మాటలు నాలో అనూహ్యమైన మార్పు తెచ్చాయి" అని అరుంధతి వివరించింది.

అప్పటి నుంచి తనను తాను చూసుకునే దృక్పథం మారిపోయిందని ఆమె తెలిపింది. "బలంగా ఉండటమంటే భావోద్వేగాలను దాచుకోవడం కాదు, వాటిని ధైర్యంగా ఎదుర్కొని ముందుకు సాగడమని నేను అప్పుడే అర్థం చేసుకున్నాను. ఆ తర్వాత ఎప్పుడు ఆత్మవిశ్వాసం కోల్పోయినా, మీ ప్రయాణాన్ని గుర్తుచేసుకునేదాన్ని. అందుకే, మీరు నాకు కేవలం ఒక నాయకుడే కాదు.. స్ఫూర్తినిచ్చిన అన్నయ్య లాంటి వారు. మీ క్రమశిక్షణ, ధైర్యం, బాధ్యతాయుత ప్రవర్తన నన్ను ఎంతగానో ప్రభావితం చేశాయి" అని ఆమె యోగిని ఉద్దేశించి రాసింది.

"నా జీవితంలో కొత్త అధ్యాయం ప్రారంభించే ముందు, నాకు తెలియకుండానే నా ఎదుగుదలలో భాగమైన మిమ్మల్ని ఆహ్వానించాలనుకున్నాను. మీ పనుల ఒత్తిడి కారణంగా ఒకవేళ మీరు రాలేకపోయినా, మీ ఆశీస్సులను సందేశం రూపంలో పంపినా చాలు. అది నాకు అమూల్యమైనది" అని అరుంధతి తన లేఖను ముగించింది. భావోద్వేగాలను బలహీనతగా కాకుండా, స్వీకరించేలా పాఠం నేర్పినందుకు యోగికి ఆమె కృతజ్ఞతలు తెలిపింది.