బాలివుడ్ స్టార్ హీరోకు షాక్.. అక్రమ కట్టడాల కూల్చివేత!

బాలీవుడ్ ప్రముఖ నటుడు అజయ్ దేవగణ్‌కు 'బృహన్‌ముంబై మున్సిపల్ కార్పొరేషన్' (బీఎంసీ) షాకిచ్చింది. ముంబైలోని జూహూ ప్రాంతంలో ఉన్న ఆయన బంగ్లాలో అక్రమ నిర్మాణాలు చేపట్టారంటూ కొన్ని భాగాలను అధికారులు కూల్చివేశారు. నోటీసులు జారీ చేసినప్పటికీ పనులు కొనసాగించడంతో బీఎంసీ ఈ చర్యలు తీసుకుంది.

వివరాల్లోకి వెళితే.. జూహూలోని కపోలే కో-ఆపరేటివ్ హౌసింగ్ సొసైటీలో 7,802 చదరపు అడుగుల విస్తీర్ణంలో అజయ్ దేవగణ్‌ బంగ్లా ఉంది. ఇందులో మున్సిపల్ అధికారుల నుంచి ఎలాంటి అనుమతులు లేకుండా అంతర్గత మార్పులు, కొత్త గోడల నిర్మాణం, కిటికీల మార్పులు వంటి పనులు చేపట్టారు. 

ఈ విషయం గుర్తించిన బీఎంసీ, ముంబై మున్సిపల్ కార్పొరేషన్ చట్టంలోని సెక్షన్ 354A కింద, పనులు వెంటనే ఆపాలని సెప్టెంబర్ 10న నోటీసులు జారీ చేసింది.

అయితే, ఆ నోటీసులను బేఖాతరు చేస్తూ నిర్మాణ పనులు కొనసాగించడంతో అధికారులు శనివారం రంగంలోకి దిగారు. సుత్తితో అక్రమ నిర్మాణాలను కూల్చివేస్తున్న దృశ్యాలు బయటకు వచ్చాయి.

ఇదిలా ఉండగా.. అజయ్ దేవగణ్‌ మరో వివాదంలోనూ చిక్కుకున్నారు. ‘విమల్ ఎలాచీ’ యాడ్‌లో నటించినందుకు ఆయనతో పాటు షారుఖ్ ఖాన్, టైగర్ ష్రాఫ్‌లకు మహారాష్ట్ర ఫుడ్ డెవలప్‌మెంట్ అథారిటీ (ఎఫ్‌డీఏ) షోకాజ్ నోటీసులు జారీ చేసింది. ఈ ప్రకటన నిషేధిత ఉత్పత్తులను ప్రోత్సహించేలా ఉందని ‘సింగం’ అధికారిగా పేరుపొందిన మహారాష్ట్ర ఎఫ్‌డీఏ చీఫ్ తుకారాం ముండే తెలిపారు.

ఒకవైపు ఇలాంటి వివాదాలు ఎదుర్కొంటుండగా, మరోవైపు అజయ్ నటించిన ‘దృశ్యం’ ఫ్రాంచైజీ ఫైనల్ చాప్టర్ బాక్సాఫీస్ వద్ద దూసుకెళుతోంది. అక్టోబర్ 2న విడుదలైన ఈ చిత్రం ఇప్పటికే రూ.400 కోట్ల క్లబ్‌లో చేరింది.