నదిని శుభ్రం చేస్తే.. డస్ట్‌బిన్‌నే ఎత్తుకెళ్లారు.. సామాజిక స్పృహ ఎక్కడ?

సమాజం బాగు కోసం ఒకరు కష్టపడి ముందుకొస్తే, పదిమంది చేయి కలపకపోయినా పర్వాలేదు కానీ, ఆ ప్రయత్నాన్ని నీరుగార్చే పనులు చేయకూడదు. మధ్యప్రదేశ్‌లో ఓ యువకుడికి సరిగ్గా ఇలాంటి చేదు అనుభవమే ఎదురైంది. నదిని కాలుష్యం నుంచి కాపాడాలని ఒంటరి పోరాటం చేస్తున్న అతడిని దొంగలు నిరాశపరిచారు. అతను ప్రజల కోసం ఏర్పాటు చేసిన చెత్తకుండీనే ఎత్తుకెళ్లి తమ బుద్ధిని చాటుకున్నారు.

వివరాల్లోకి వెళితే.. మధ్యప్రదేశ్‌లోని రాజ్‌గఢ్ జిల్లాకు చెందిన 20 ఏళ్ల విద్యార్థి సురేంద్ర సింగ్ చౌదరి, సోషల్ మీడియాలో 'బిట్టూ తబాహీ'గా సుపరిచితుడు. తన ప్రాంతంలోని అజ్నార్ నది కాలుష్యంతో నిండిపోవడాన్ని చూసి చలించిపోయాడు. నెలల తరబడి ఒంటరిగా శ్రమించి నదిని, దాని ఒడ్డును శుభ్రం చేశాడు. అయితే, కొద్ది వారాలకే మళ్లీ ప్లాస్టిక్ సంచులు, ఇతర వ్యర్థాలతో నది పరిసరాలు మురికిగా మారాయి.

దీంతో సురేంద్ర మరోసారి నదిని శుభ్రపరిచే పని చేపట్టాడు. ఈసారి ప్రజలు చెత్తను నదిలో వేయకుండా ఉండేందుకు, నది ఒడ్డున ఉన్న ఓ చెట్టు కింద రెండు పెద్ద చెత్త డ్రమ్ములను (డస్ట్‌బిన్‌లు) ఏర్పాటు చేశాడు. ప్రజలు వ్యర్థాలను అందులో వేస్తారని, తద్వారా నది మళ్లీ కలుషితం కాకుండా ఉంటుందని ఆశించాడు. అయితే, తిరిగి వచ్చి చూసేసరికి అతనికి షాక్ తగిలింది. అతను పెట్టిన రెండు డస్ట్‌బిన్‌లలో ఒకటి కనిపించలేదు. ఎవరో దాన్ని దొంగిలించుకుపోయారు.

ఈ ఘటనతో తీవ్ర నిరాశకు గురైన సురేంద్ర, తన ఆవేదనను ఇన్‌స్టాగ్రామ్‌లో వీడియో ద్వారా పంచుకున్నాడు. "ఈ చెత్తకుండీలను నా సొంత ఉపయోగం కోసం నేను ఇక్కడ పెట్టలేదు. ప్రజలు చెత్తను నదిలో పడేయకుండా, ఇందులో వేస్తారని ఏర్పాటు చేశాను. కానీ, దాన్నే దొంగిలించారు" అని ఆవేదన వ్యక్తం చేశాడు. 

ప్రజల సౌకర్యార్థం పెట్టిన డ్రమ్ములను కూడా దొంగిలించారని క్యాప్షన్‌లో పేర్కొన్నాడు. ఈ ఘటనపై నెటిజన్లు తీవ్రంగా స్పందిస్తున్నారు. కనీస సామాజిక స్పృహ లేకుండా ప్రవర్తించే వారి వల్ల, మంచి చేయాలనుకునే వారికి ఎలాంటి అడ్డంకులు ఎదురవుతాయో ఈ ఘటనే నిదర్శనమని కామెంట్లు చేస్తున్నారు. ప్రభుత్వ, ప్రజల సహకారం లేకుండా ఇలాంటి వ్యక్తిగత ప్రయత్నాలు ఎంత కష్టమో ఇది చూపిస్తోందని పలువురు అభిప్రాయపడుతున్నారు.