నిరసనలపై వివాదాస్పద వ్యాఖ్యలు.. విమర్శల తర్వాత క్లారిటీ ఇచ్చిన బ్రహ్మాజీ

ప్రముఖ నటుడు బ్రహ్మాజీ సోషల్ మీడియాలో చేసిన వ్యాఖ్యలు తీవ్ర చర్చనీయాంశంగా మారాయి. దేశవ్యాప్తంగా జరుగుతున్న నిరసనలను ఉద్దేశించి "నిరసన ఇప్పుడు ఒక కొత్త వృత్తి" అంటూ ఆయన చేసిన పోస్ట్‌పై నెటిజన్ల నుంచి తీవ్ర విమర్శలు వెల్లువెత్తాయి. ఈ నేపథ్యంలో బ్రహ్మాజీ స్పందించి, తన వ్యాఖ్యలపై వివరణ ఇచ్చారు.

ఇటీవల నీట్ పరీక్ష, చీఫ్ ఎలక్షన్ కమిషనర్ జ్ఞానేశ్ కుమార్ రాజీనామా వంటి అంశాలపై విద్యార్థులు, నిరుద్యోగులు చేస్తున్న ఆందోళనలను కించపరిచేలా బ్రహ్మాజీ వ్యాఖ్యలు ఉన్నాయని పలువురు సోషల్ మీడియాలో ఆగ్రహం వ్యక్తం చేశారు. దీంతో ఆయనపై తీవ్రస్థాయిలో ట్రోలింగ్ జరిగింది.

ఈ విమర్శలపై బ్రహ్మాజీ మరో పోస్ట్ ద్వారా స్పందించారు. అన్ని నిరసనలు నిజమైనవి కావని, కొన్నింటి వెనుక స్వార్థ శక్తులు ఉంటాయని ఆయన అభిప్రాయపడ్డారు. "ప్రతి నిరసన ప్రామాణికమైనది కాదు. కొన్ని నిజమైన వ్యథల నుంచి పుట్టుకొస్తాయి. మరికొన్ని తెరవెనుక ఉన్న స్వార్థపరులైన శక్తుల చేత నిధులు సమకూర్చబడి, నిర్వహించబడి, నిర్దేశించబడుతుంటాయి. నిజమైన అట్టడుగు స్థాయి ఉద్యమాలు గౌరవించదగినవి. కానీ, సృష్టించబడిన నిరసనలు ప్రజలకు కాకుండా కేవలం కొన్ని ఎజెండాలకు మాత్రమే సేవ చేస్తాయి" అని బ్రహ్మాజీ పేర్కొన్నారు. ఈ టాపిక్‌ను ఇక్కడితో ఆపేస్తున్నానని చెబుతూ ఆయన ఈ చర్చకు ముగింపు పలికారు.