నన్ను కాపాడింది ట్రంప్.. నా దేశ అధికారులే నన్ను గాలికొదిలేశారు: అమెరికా మాజీ సైనికుడు

మయన్మార్‌లో 97 రోజుల పాటు నిర్బంధంలో గడిపిన అమెరికా మాజీ సైనికుడు, వ్యాపారవేత్త ఆడమ్ కాస్టిల్లో తన విడుదలకు మాజీ అధ్యక్షుడు డొనాల్డ్ ట్రంప్ కారణమని చెబుతూ సంచలన వ్యాఖ్యలు చేశారు. తన దేశానికి చెందిన విదేశాంగ శాఖ, దౌత్యవేత్తలు మాత్రం కష్టకాలంలో తనను పూర్తిగా గాలికొదిలేశారని తీవ్ర ఆరోపణలు చేశారు. తన ప్రాణాలను కాపాడింది ట్రంప్ మాత్రమేనని, ఆయనకు జీవితాంతం రుణపడి ఉంటానని కాస్టిల్లో పేర్కొన్నారు.

ఆఫ్ఘనిస్థాన్ యుద్ధంలో పాల్గొన్న ఆడమ్ కాస్టిల్లో, గత 13 ఏళ్లుగా మయన్మార్‌లో నివసిస్తూ వ్యాపారం చేస్తున్నారు. అక్కడి అమెరికన్ ఛాంబర్ ఆఫ్ కామర్స్‌కు గతంలో అధ్యక్షుడిగా కూడా పనిచేశారు. సంస్థలో తలెత్తిన ఒక అంతర్గత వివాదం కారణంగా తనపై ఆర్థిక అవకతవకల ఆరోపణలు వచ్చాయని, దాని ఫలితంగానే తనను అరెస్ట్ చేశారని ఆయన వివరించారు. ఈ ఏడాది జూన్ 11న యాంగాన్ అంతర్జాతీయ విమానాశ్రయంలో అధికారులు తనను అదుపులోకి తీసుకున్నారని తెలిపారు.

‘ఐఏఎన్ఎస్’ వార్తా సంస్థకు ఇచ్చిన ప్రత్యేక ఇంటర్వ్యూలో కాస్టిల్లో మాట్లాడుతూ.. "నన్ను అరెస్ట్ చేశాక 14 రోజులు పోలీస్ విచారణ కేంద్రంలో, ఆ తర్వాత 83 రోజులు అక్కడి భయంకరమైన ఇన్‌సీన్ జైలులో ఉంచారు. అయితే నాపై ఎలాంటి నేరం రుజువు కాలేదు, శిక్ష కూడా విధించలేదు. కేవలం నిర్బంధించారు. నిజం చెప్పాలంటే, ట్రంప్ లేకపోతే నేను ఈ రోజు ప్రాణాలతో ఉండేవాడిని కాదు" అని అన్నారు.

తన విడుదల కోసం ఉపాధ్యక్షుడు జేడీ వాన్స్, పలువురు మత పెద్దలు, ప్రైవేట్ సంస్థలు కృషి చేశాయని కాస్టిల్లో కృతజ్ఞతలు తెలిపారు. అయితే, అమెరికా విదేశాంగ శాఖ తీరుపై ఆయన తీవ్ర అసహనం వ్యక్తం చేశారు. "స్టేట్ డిపార్ట్‌మెంట్ సిగ్గుపడాలి. నా నిర్బంధం గురించి తెలిసినా వాళ్లు ఏమీ చేయలేదు. నా కుటుంబ సభ్యులు ఎంబసీ సాయం కోసం ప్రయత్నించినా ఫలితం లేకపోయింది. వైట్‌హౌస్ జోక్యం చేసుకున్న తర్వాతే దౌత్యపరమైన ప్రయత్నాలు మొదలయ్యాయి" అని ఆయన ఆరోపించారు. నిర్బంధంలో ఉన్నప్పుడు దౌత్య అధికారులు తనను నాలుగుసార్లు కలిశారని, కానీ వారి నుంచి ఎలాంటి సాయం అందలేదని వాపోయారు.

అయితే, జైలులో తనను ఎవరూ హింసించలేదని, అక్కడి పరిస్థితులు గతంతో పోలిస్తే మెరుగుపడ్డాయని కాస్టిల్లో పేర్కొన్నారు. కాస్టిల్లో ఆరోపణలపై అమెరికా విదేశాంగ శాఖ గానీ, మయన్మార్‌లోని యూఎస్ ఎంబసీ గానీ ఇప్పటివరకు స్పందించలేదు.