ఇదే ప్రపంచంలో అత్యంత లోతైన మెట్రో స్టేషన్.. ఎక్కడ ఉందో తెలుసా?

సాధారణంగా మెట్రో స్టేషన్ అంటే భూమికి కొద్ది లోతులో ఉంటుంది. కానీ, చైనాలోని ఓ మెట్రో స్టేషన్ మాత్రం ఏకంగా 40 అంతస్థుల భవనం అంత లోతులో నిర్మితమై ప్రపంచాన్ని ఆశ్చర్యపరుస్తోంది. చోంగ్‌కింగ్ నగరంలో ఉన్న ఈ 'హాంగ్‌యాన్‌కున్' స్టేషన్ ప్రపంచంలోనే అత్యంత లోతైన మెట్రో స్టేషన్‌గా రికార్డు సృష్టించింది. ఇది భూ ఉపరితలం నుంచి ఏకంగా 116 మీటర్ల (సుమారు 380 అడుగులు) లోతులో ఉంది.

2022లో ప్రారంభమైన ఈ స్టేషన్‌లోకి ప్రవేశించిన ప్రయాణికులు ప్లాట్‌ఫామ్‌ను చేరుకోవాలంటే అక్షరాలా ఓ చిన్న ప్రయాణమే చేయాలి. ఇందుకోసం వారు ఒకదాని తర్వాత ఒకటిగా సుమారు 10 ఎస్కలేటర్లు దిగాల్సి ఉంటుంది. ఈ మొత్తం ప్రయాణానికి చాలా నిమిషాల సమయం పడుతుంది. 

ఈ సుదీర్ఘ ఎస్కలేటర్ ప్రయాణానికి సంబంధించిన వీడియోలు ప్రస్తుతం సోషల్ మీడియాలో వైరల్‌గా మారాయి. ప్రయాణికులు ఒక ఎస్కలేటర్ దిగి, మరికొన్ని అడుగులు నడిచి, మరో ఎస్కలేటర్ ఎక్కడం ఈ వీడియోలలో స్పష్టంగా కనిపిస్తుంది.

చోంగ్‌కింగ్ నగరం పూర్తిగా పర్వతాలు, ఎత్తైన కొండలతో నిండి ఉంటుంది. ఈ క్లిష్టమైన భౌగోళిక పరిస్థితుల కారణంగానే స్ట్రీట్ లెవల్‌కు, రైలు పట్టాలకు మధ్య ఇంత భారీ వ్యత్యాసం ఏర్పడింది. అందుకే ఇంజినీర్లు ఇంత లోతులో స్టేషన్‌ను నిర్మించాల్సి వచ్చింది. ఈ స్టేషన్‌లోని కొన్ని ఎగ్జిట్ పాయింట్లు నేరుగా భూమి మీదకు కాకుండా, ఎత్తైన రహదారులపైకి దారి తీయడం ఇక్కడి భౌగోళిక నిర్మాణానికి అద్దం పడుతుంది.

ఈ స్టేషన్ నిర్మాణంతో ఇప్పటివరకు అత్యంత లోతైన మెట్రో స్టేషన్‌గా ఉన్న ఉక్రెయిన్‌లోని 'అర్సెనల్నా స్టేషన్' (105.5 మీటర్లు) రికార్డు బద్దలైంది. రష్యాలోని సెయింట్ పీటర్స్‌బర్గ్, ఉత్తర కొరియాలోని ప్యాంగాంగ్ వంటి నగరాల్లో కూడా ఇలాంటి లోతైన మెట్రో స్టేషన్లు ఉన్నాయి. 

క్లిష్టమైన భౌగోళిక సవాళ్లను అధిగమించి, ప్రజా రవాణా వ్యవస్థలను నిర్మించడంలో ఆధునిక ఇంజినీరింగ్ నైపుణ్యానికి ఈ హాంగ్‌యాన్‌కున్ స్టేషన్ ఒక నిదర్శనంగా నిలుస్తోంది.