వాఘాలో అరుదైన దృశ్యం.. పాక్ సైనికుడితో ఫొటో దిగిన భార‌త ఆర్మీ ఆఫీస‌ర్ భార్య‌.. ఇదిగో వీడియో!

భారత్, పాకిస్థాన్ మధ్య నిత్యం ఉద్రిక్తతలు నెలకొనే అట్టారీ-వాఘా సరిహద్దులో ఓ ఆసక్తికర ఘటన చోటుచేసుకుంది. భారత ఆర్మీ అధికారి భార్యతో ఓ పాకిస్థానీ రేంజర్ ఫొటో దిగడం, ఆ తర్వాత ఆ అధికారికి సెల్యూట్ చేయడం ఇప్పుడు సోషల్ మీడియాలో వైరల్ అయింది. ఈ ఘటన ఇరు దేశాల సైనికుల మధ్య ఉండే వృత్తిగౌరవానికి అద్దం పడుతోంది.

వివరాల్లోకి వెళితే.. ఇటీవల ఓ భారత ఆర్మీ అధికారి తన కుటుంబంతో కలిసి వాఘా సరిహద్దును సందర్శించారు. ఈ సందర్భంగా ఆయన భార్య, అక్కడ విధుల్లో ఉన్న పాకిస్థాన్ రేంజర్‌తో ఫొటో దిగేందుకు అనుమతి కోరారు. ఇందుకు ఆ సైనికుడు మర్యాదపూర్వకంగా అంగీకరించి, ఆమెతో కలిసి ఫొటోకు పోజు ఇచ్చారు.

ఫొటో దిగిన అనంతరం, సమీపంలోనే ఉన్న భారత ఆర్మీ అధికారిని పాక్ రేంజర్ గమనించారు. వెంటనే ఆయనకు సైనిక లాంఛనాల ప్రకారం సెల్యూట్ చేశారు. ప్రతిగా భారత అధికారి కూడా సెల్యూట్ చేసి గౌరవాన్ని తెలియజేశారు. రోజువారీ బీటింగ్ రిట్రీట్ జరిగే ప్రాంతానికి సమీపంలో ఈ దృశ్యం చోటుచేసుకుంది.

ఈ వీడియో ఆన్‌లైన్‌లో వైరల్ కావడంతో నెటిజన్లు స్పందిస్తున్నారు. ఇరు దేశాల మధ్య ఎంత సున్నితమైన వాతావరణం ఉన్నప్పటికీ, సైనికులు తమ వృత్తి గౌరవాన్ని, క్రమశిక్షణను ప్రదర్శించారని ప్రశంసిస్తున్నారు. ఇది హోదాలకు ఇచ్చిపుచ్చుకునే గౌరవానికి నిదర్శనమని కామెంట్లు చేస్తున్నారు.