వయసు 90, మనసు ఉక్కు.. జపాన్ బాడీబిల్డర్ స్ఫూర్తి గాథ!

వయసు కేవలం ఒక సంఖ్య మాత్రమేనని నిరూపించే వారు కొందరే ఉంటారు. అలాంటి వారిలో ముందు వరుసలో నిలుస్తారు జపాన్‌కు చెందిన తోషిసుకె కనజావా. 90 ఏళ్ల వయసులో కూడా ఆయన సాధించిన ఘనత చూస్తే ఎవరైనా ఆశ్చర్యపోవాల్సిందే. తన 90వ పుట్టినరోజు వేడుకలు జరుపుకున్న మరుసటి రోజే, ఆయన మరో జాతీయ బాడీబిల్డింగ్ టైటిల్‌ను గెలుచుకుని ప్రపంచాన్ని అబ్బురపరిచారు. 'ఆల్ జపాన్ మాస్టర్స్ ఫిట్‌నెస్ ఛాంపియన్‌షిప్'లో 85 ఏళ్లు పైబడిన విభాగంలో విజేతగా నిలిచి, తన కెరీర్‌లో 19వ జాతీయ టైటిల్‌ను సగర్వంగా అందుకున్నారు.

హిరోషిమాకు చెందిన కనజావా ప్రస్థానం ఎందరికో స్ఫూర్తిదాయకం. 1936లో జన్మించిన ఆయన, యుక్తవయసులో ఈతగాడిగా ఒలింపిక్స్‌లో పాల్గొనాలని కలలు కన్నారు. అయితే కండరాల సమస్య కారణంగా ఆ కలను వదులుకుని, తన దృష్టిని బాడీబిల్డింగ్ వైపు మళ్లించారు. తన 24, 27వ ఏట 'మిస్టర్ జపాన్' టైటిళ్లను గెలుచుకుని సత్తా చాటారు. అయితే, 34 ఏళ్ల వయసులో పోటీలకు వీడ్కోలు పలికారు. కానీ విధి ఆయనను మళ్లీ పోటీల వైపు నడిపించింది. ఆరోగ్యం బాగోలేని తన భార్యలో స్ఫూర్తి నింపడానికి, 50 ఏళ్ల వయసులో మళ్లీ కండల ప్రదర్శనకు సిద్ధమయ్యారు. ఆ పునరాగమనం ఆయన జీవితంలో చారిత్రాత్మకంగా నిలిచింది. అప్పటి నుంచి వెనుదిరిగి చూడని ఆయన, 80 ఏళ్లు దాటిన తర్వాత ఆరు వరల్డ్ మాస్టర్స్ టైటిళ్లను గెలుచుకోవడం విశేషం.

కనజావా విజయ రహస్యం ఆయన జీవనశైలిలోనే దాగి ఉంది. ఆయన పూర్తి శాకాహారి. గత 50 ఏళ్లుగా మాంసం, చేపలకు దూరంగా ఉంటున్నారు. బ్రౌన్ రైస్, పులియబెట్టిన సోయాబీన్స్‌తో చేసే నాటో, మిసో సూప్ వంటి సంప్రదాయ జపనీస్ ఆహారంతో పాటు ప్రొటీన్ సప్లిమెంట్లు తీసుకుంటారు. వయసు మీద పడుతున్నా, క్రమశిక్షణ మాత్రం వీడలేదు. వారంలో ఆరు రోజులు, రోజుకు రెండు గంటల పాటు జిమ్‌లో కఠోరంగా శ్రమిస్తారు. వయసును దృష్టిలో ఉంచుకుని భారీ బరువులకు బదులుగా మెషీన్లపై ఎక్కువ దృష్టి సారిస్తున్నారు.

ప్రముఖ హాలీవుడ్ నటుడు, బాడీబిల్డర్ ఆర్నాల్డ్ ష్వార్జ్‌నెగ్గర్‌ను కలవాలనేది తన చిరకాల కోరిక అని కనజావా చెబుతారు. "చనిపోయే వరకు బాడీబిల్డర్‌గా ఉంటాను" అని ఆయన చెప్పే మాటలు ఆయన పట్టుదలకు, క్రీడ పట్ల ఆయనకున్న అంకితభావానికి నిదర్శనం. ప్రస్తుతం హిరోషిమాలో సొంతంగా జిమ్ నడుపుతున్న ఈ ఉక్కు మనిషి, వృద్ధాప్యంలో శారీరకంగా, మానసికంగా ఎలా దృఢంగా ఉండవచ్చో ప్రపంచానికి చాటిచెబుతూ ఎందరికో ఆదర్శంగా నిలుస్తున్నారు.