యూపీ పోలీసు విభాగాన్ని రద్దు చేసి.. అన్ని కేసులు సీబీఐకి అప్పగిస్తాం: సుప్రీంకోర్టు ఆగ్రహం

ఉత్తరప్రదేశ్ పోలీసుల దర్యాప్తు తీరుపై సుప్రీంకోర్టు తీవ్ర ఆగ్రహం వ్యక్తం చేసింది. అవసరమైతే యూపీ పోలీసు విభాగాన్నే రద్దు చేసి, రాష్ట్రంలోని అన్ని కేసుల దర్యాప్తును సీబీఐకి అప్పగించాల్సి వస్తుందని సంచలన వ్యాఖ్యలు చేసింది. ఒక క్రిమినల్ కేసులో పోలీసులు అనుసరిస్తున్న పక్షపాత వైఖరిని గమనించిన న్యాయస్థానం ఈ ఘాటు వ్యాఖ్యలు చేసింది.

జస్టిస్ సంజయ్ కుమార్, జస్టిస్ సంజీవ్ సచ్‌దేవాలతో కూడిన ధర్మాసనం ఒక మహిళ దాఖలు చేసిన పిటిషన్‌ను విచారించింది. తనపై దాడికి యత్నించిన ఒక మోటార్‌ సైకిలిస్టును పట్టుకుని పోలీసులకు అప్పగిస్తే, వారు మాత్రం గుర్తుతెలియని వ్యక్తిపై ఎఫ్‌ఐఆర్ నమోదు చేశారని పిటిషనర్ కోర్టుకు తెలిపారు. ఈ వ్యవహారంపై యూపీ పోలీసులు దాఖలు చేసిన అఫిడవిట్‌పై ధర్మాసనం తీవ్ర అసంతృప్తి వ్యక్తం చేసింది.

"నిందితుడిని ఘటనా స్థలంలోనే పట్టుకున్నప్పుడు, గుర్తుతెలియని వ్యక్తిపై ఎందుకు ఎఫ్‌ఐఆర్ నమోదు చేశారు? ఇలా చేస్తే ప్రజలకు పోలీసులపై నమ్మకం ఎలా ఉంటుంది?" అని ధర్మాసనం ప్రశ్నించింది. "మీ ప్రతి పనిలో ఒక అజెండా కనిపిస్తోంది. ఈ అసంబద్ధతకు ఎక్కడో ఒకచోట అడ్డుకట్ట పడాలి. యూపీ పోలీసులను రద్దు చేసి, అన్ని కేసులను సీబీఐకి అప్పగించడమే మేలు" అని తీవ్రంగా వ్యాఖ్యానించింది. ఈ కేసులో పోలీసులు వ్యవహరించిన తీరుపై సరైన వివరణతో మరో అఫిడవిట్ దాఖలు చేయాలని, తదుపరి విచారణకు సంబంధిత పోలీస్ అధికారి వ్యక్తిగతంగా హాజరుకావాలని సుప్రీంకోర్టు ఆదేశించింది.