జపాన్‌లో సరికొత్త రికార్డు.. లక్ష దాటిన శతాధికులు.. 88 శాతం మహిళలే!

జపాన్‌లో శతాధికుల (వందేళ్లకు పైబడిన వారు) సంఖ్య తొలిసారిగా లక్ష మార్కును అధిగమించింది. దేశంలో ప్రస్తుతం 1,07,677 మంది శతాధికులు ఉన్నట్లు జపాన్ ఆరోగ్య మంత్రిత్వ శాఖ సెప్టెంబర్ 15న అధికారికంగా ప్రకటించింది. వందేళ్లు పైబడిన వారి సంఖ్య పెరగడం ఇది వరుసగా 56వ సంవత్సరం కావడం గమనార్హం.

ఆరోగ్య శాఖ విడుదల చేసిన గణాంకాల ప్రకారం, శతాధికుల్లో మహిళలదే అగ్రస్థానం. మొత్తం సంఖ్యలో సుమారు 88 శాతం, అంటే 94,298 మంది మహిళలే ఉన్నారు. ప్రస్తుతం దేశంలో అత్యంత వృద్ధురాలిగా క్యోటోకు చెందిన 114 ఏళ్ల ఫుయో కిషిమోటో, అత్యంత వృద్ధుడిగా కుమామోటోకు చెందిన 112 ఏళ్ల హికారు కాటో రికార్డుల్లో నిలిచారు.

జపాన్‌లో శతాధికుల సంఖ్య వృద్ధిని పరిశీలిస్తే, 1963లో గణాంకాల సేకరణ ప్రారంభమైనప్పుడు వీరి సంఖ్య కేవలం 153 మాత్రమే. ఆ సంఖ్య 1981 నాటికి వెయ్యి దాటగా, 1998లో 10,000కు, 2012లో 50,000కు చేరింది. ఇప్పుడు ఏకంగా లక్ష మార్కును దాటి సరికొత్త రికార్డును నమోదు చేసింది.

ఈ గణాంకాలపై జపాన్ ఆరోగ్య శాఖ మంత్రి కెనిచిరో యునో హర్షం వ్యక్తం చేశారు. వైద్య, సాంకేతిక రంగాల్లో సాధించిన అద్భుత ప్రగతి వల్లే ప్రజలు ఆరోగ్యకరమైన, క్రియాశీలక దీర్ఘాయుష్షును పొందుతున్నారని ఆయన పేర్కొన్నారు. జపాన్‌లో ఏటా నిర్వహించే 'రెస్పెక్ట్ ఫర్ ది ఏజ్డ్' అనే ప్రభుత్వ సెలవుదినానికి ముందు ఈ వివరాలను విడుదల చేశారు. ఈ సందర్భాన్ని పురస్కరించుకుని వందేళ్లు పూర్తి చేసుకున్న వారిని ప్రభుత్వం గౌరవించడం ఆనవాయతీగా వస్తోంది. కాగా, ప్రస్తుతం జపాన్ జనాభా 12 కోట్లకు పైగా ఉంది. జనాభాలో సుమారు 30 శాతం మంది 65 ఏళ్లు ఆపై వయస్సు గల వారు ఉన్నారు.