అరంగేట్రంలోనే రికార్డు మోత.. పాక్‌ ఆటగాడు రజావుల్లాకు ఇంగ్లీష్ ప్రేక్షకులు స్టాండింగ్ ఓవేషన్.. ఇదిగో వీడియో!

క్రికెట్‌లో అరంగేట్రం చేసిన మ్యాచ్ ప్రతి ఆటగాడికి చిరస్మరణీయం. కానీ, పాకిస్థాన్‌కు చెందిన 21 ఏళ్ల యువ పేసర్ రజావుల్లా తన తొలి టెస్టును ఎప్పటికీ మరిచిపోలేని విధంగా మలుచుకున్నాడు. బౌలర్‌గా జట్టులోకి వచ్చి, బ్యాట్‌తో విధ్వంసం సృష్టించాడు. ఇంగ్లండ్‌తో జరుగుతున్న ఆఖరి టెస్టులో ఓటమి అంచున నిలిచిన పాకిస్థాన్‌ను తన అద్భుత ఇన్నింగ్స్‌తో ఆదుకున్నాడు. కేవలం 63 బంతుల్లో 9 సిక్సర్లు, 81 పరుగులతో ఇంగ్లండ్ బౌలర్లకు చుక్కలు చూపించాడు. ఈ ప్రదర్శనకు ఎడ్జ్‌బాస్టన్ స్టేడియం మొత్తం నిలబడి చప్పట్లతో (స్టాండింగ్ ఓవేషన్) అభినందించింది.

మూడో రోజు ఆటలో పాకిస్థాన్ ఇన్నింగ్స్ ఓటమి దిశగా సాగుతున్నప్పుడు రజావుల్లా 9వ స్థానంలో బ్యాటింగ్‌కు వచ్చాడు. జోఫ్రా ఆర్చర్, గస్ అట్కిన్సన్, జోష్ టంగ్ వంటి ఇంగ్లండ్ మేటి పేస్ బౌలర్లను ఏమాత్రం భయపడకుండా ఎదుర్కొన్నాడు. ముఖ్యంగా పాక్ టాప్ ఆర్డర్ బ్యాటర్లను ఇబ్బంది పెట్టిన షార్ట్ బంతులనే లక్ష్యంగా చేసుకుని భారీ షాట్లు ఆడాడు. ఈ క్రమంలో కేవలం 43 బంతుల్లోనే హాఫ్ సెంచరీ పూర్తి చేసుకున్నాడు. టెస్టు అరంగేట్రంలో పాకిస్థాన్ తరఫున అత్యంత వేగవంతమైన హాఫ్ సెంచరీ ఇదే కావడం విశేషం.

ఈ మ్యాచ్‌లో మహమ్మద్ అబ్బాస్‌ (42)తో కలిసి రజావుల్లా 121 పరుగుల కీలక భాగస్వామ్యం నెలకొల్పాడు. ఈ ఇద్దరి పోరాటంతో పాకిస్థాన్ 449 పరుగుల స్కోరు చేసింది.

త‌న అద్భుత‌మైన‌ ఇన్నింగ్స్ పై రజావుల్లా మాట్లాడుతూ.. "ప్రేక్షకులు నిలబడి చప్పట్లు కొడుతుంటే చాలా ఆనందంగా అనిపించింది. నేను జీవితాన్ని ఆస్వాదించాలనుకుంటాను. నాకు షార్ట్ బాల్ అంటే చాలా ఇష్టం. దేశం కోసం ఆడుతున్నప్పుడు భయపడాల్సిన అవసరం లేదు. నాపై నాకు నమ్మకం ఉంది. అందుకే సానుకూల ఫలితం వచ్చింది" అని తెలిపాడు. అరంగేట్రంలోనే అద్భుత శతకం చేసేలా కనిపించినా, రజావుల్లా ఆ మార్కుకు 19 పరుగుల దూరంలో ఔటయ్యాడు. అయినప్పటికీ, అతని పోరాట పటిమ క్రీడా ప్రపంచాన్ని ఆకట్టుకుంది.