సమావేశానికి డుమ్మా.. అధికారులపై సీఎం ఫైర్.. వివరణ కోరాలని ఆదేశం

ప్రభుత్వ పాలనలో వేగం పెంచే లక్ష్యంతో నిర్వహిస్తున్న కలెక్టర్ల సదస్సులో కొందరు అధికారుల తీరుపై ముఖ్యమంత్రి నారా చంద్రబాబు నాయుడు తీవ్ర ఆగ్రహం వ్యక్తం చేశారు. అమరావతిలో జరిగిన ఈ సమావేశానికి కొందరు శాఖాధిపతులు (హెచ్‌వోడీలు) గైర్హాజరు కావడం, ఫైళ్ల పరిష్కారంలో తీవ్ర జాప్యం చోటుచేసుకోవడంపై ఆయన మండిపడ్డారు.

రెండు రోజుల పాటు జరిగే కలెక్టర్ల సదస్సుకు హాజరుకాకపోవడాన్ని చంద్రబాబు తీవ్రంగా పరిగణించారు. "సమావేశానికి గైర్హాజరయ్యేంత ధైర్యం ఎక్కడిది?" అని ప్రశ్నిస్తూ, రాని అధికారులందరి నుంచి తక్షణమే సంజాయిషీ కోరాలని ప్రభుత్వ ప్రధాన కార్యదర్శి సాయిప్రసాద్‌ను ఆదేశించారు. సమావేశానికి వచ్చేటప్పుడు మొబైల్ ఫోన్లు తీసుకురావద్దని, కనీసం 12 గంటల పాటు ఏకాగ్రతతో కూర్చోలేరా? అని అధికారులను నిలదీశారు. మంత్రులు సైతం తమ శాఖల అధికారులతో ముందుగానే సమీక్షలు నిర్వహించి, పూర్తి సన్నద్ధతతో సదస్సుకు రావాలని సూచించారు.

ఫైళ్ల క్లియరెన్స్‌పై ఐటీ శాఖ కార్యదర్శి కాటమనేని భాస్కర్ సమర్పించిన గణాంకాలను ముఖ్యమంత్రి సమీక్షించారు. గతంతో పోలిస్తే పరిస్థితి మెరుగైనప్పటికీ, కొందరు శాఖాధిపతులు ఇంకా నిర్లక్ష్యంగా వ్యవహరించడంపై అసంతృప్తి వ్యక్తం చేశారు. ఫైళ్లను రోజుల తరబడి పెండింగ్‌లో ఉంచుతున్న అధికారుల పేర్లను చదివి వినిపిస్తూ వివరణ కోరారు. ఇకపై ఆఫ్‌లైన్ ఫైళ్లకు తావుండకూడదని, అవసరమైతే అధికారులకు ఐటీ నైపుణ్యాలపై శిక్షణ ఇప్పించాలని స్పష్టం చేశారు. పరిశ్రమల శాఖ కమిషనర్ వద్ద ఫైళ్లు 10 రోజులుగా పెండింగ్‌లో ఉండటంపై ఆయన తీవ్ర అసహనం వ్యక్తం చేశారు.

అదే సమయంలో, కలెక్టర్లు చేపడుతున్న వినూత్న కార్యక్రమాలను చంద్రబాబు అభినందించారు. ప్రతి జిల్లాను ఒక పరిశోధన, అభివృద్ధి కేంద్రంగా (ఆర్ అండ్ డీ హబ్) తీర్చిదిద్దాలని, ఒక జిల్లాలోని ఉత్తమ విధానాలను ఇతర జిల్లాల్లోనూ అమలు చేసేలా చర్యలు తీసుకోవాలని అధికారులకు దిశానిర్దేశం చేశారు.