జెలెన్‌స్కీ విమానానికి డ్రోన్ గండం.. త్రుటిలో తప్పిన ముప్పు!

ఉక్రెయిన్ అధ్యక్షుడు వొలొదిమిర్ జెలెన్‌స్కీ ప్రయాణిస్తున్న విమానానికి పెను ప్రమాదం త్రుటిలో తప్పింది. మాల్డోవా నుంచి ఆయన బయల్దేరడానికి సిద్ధమవుతున్న సమయంలో రష్యాకు చెందిన డ్రోన్ ఒకటి విమానాన్ని దాదాపు ఢీకొట్టినంత పనిచేసిందని నార్వే ప్రధాని జోనాస్ గహర్ స్టోర్ సంచలన విషయం వెల్లడించారు. ఈ ఘటనతో అంతర్జాతీయంగా తీవ్ర కలకలం రేగింది.

నార్వే రాజు హెరాల్డ్ V అంత్యక్రియల్లో పాల్గొనేందుకు జెలెన్‌స్కీ మంగళవారం మాల్డోవా నుంచి ఓస్లోకు బయలుదేరారు. అదే సమయంలో రెండు రష్యన్ డ్రోన్లు మాల్డోవా గగనతలంలోకి ప్రవేశించడంతో అధికారులు అప్రమత్తమయ్యారు. భద్రతా కారణాల దృష్ట్యా చిసినావు అంతర్జాతీయ విమానాశ్రయాన్ని తాత్కాలికంగా మూసివేసి, విమానాల రాకపోకలను నిలిపివేశారు. దీంతో జెలెన్‌స్కీ ప్రయాణం ఆలస్యమైంది.

అయితే, జెలెన్‌స్కీ విమానానికి డ్రోన్ ఎంత సమీపంలోకి వచ్చిందనే దానిపై భిన్న కథనాలు వినిపిస్తున్నాయి. విమానానికి డ్రోన్ దాదాపు తగిలిందని నార్వే ప్రధాని చెప్పగా, ఉక్రెయిన్ అధ్యక్ష కార్యాలయానికి చెందిన మరో అధికారి మాత్రం ఈ ప్రచారంలో కొంత అతిశయోక్తి ఉందని ఏఎఫ్‌పీ వార్తా సంస్థకు తెలిపారు. జెట్ ఆధారిత షాహెద్ తరహా డ్రోన్‌తో ప్రమాదం జరగాల్సిందని, అధ్యక్షుడి విమానాన్ని లక్ష్యంగా చేసుకున్నారా అనే కోణంలో దర్యాప్తు చేస్తున్నామని ఓ సీనియర్ ఉక్రెయిన్ అధికారి ఫైనాన్షియల్ టైమ్స్‌కు వివరించారు.

ఈ ఘటన తర్వాత జెలెన్‌స్కీ సురక్షితంగా ఓస్లో చేరుకున్నారు. అనంతరం బుధవారం జరిగిన రాజు హెరాల్డ్ V అంత్యక్రియల ఊరేగింపులో ఇతర ప్రపంచ నేతలతో కలిసి పాల్గొన్నారు. తన పర్యటనలో భాగంగా రష్యా దాడులు పెరుగుతున్న నేపథ్యంలో ఉక్రెయిన్‌కు వాయు రక్షణ వ్యవస్థలను అందించడంపై నార్వే అధికారులతో చర్చించారు. ఈ ఘటనపై రష్యా నుంచి ఇప్పటివరకు ఎలాంటి అధికారిక ప్రకటన రాలేదు. ఓస్లోలో కార్యక్రమాలు ముగించుకున్న తర్వాత జెలెన్‌స్కీ కెనడా పర్యటనకు వెళ్లినట్లు నార్వే ప్రధాని తెలిపారు.