ఏఐ ఉద్యోగాలు తీసేస్తుందనడం నాన్సెన్స్: ఎన్విడియా సీఈవో జెన్సన్ హువాంగ్

ఆర్టిఫిషియల్ ఇంటెలిజెన్స్ (ఏఐ) కారణంగా ఉద్యోగాలకు ముప్పు వాటిల్లుతుందనే వాదనలను ప్రముఖ చిప్ తయారీ సంస్థ 'ఎన్విడియా' సీఈవో జెన్సన్ హువాంగ్ తోసిపుచ్చారు. అదొక నిరాధారమైన ప్రచారమని ఆయన స్పష్టం చేశారు. అమెరికాలోని నార్త్ కరోలినాలో వాణిజ్య కార్యదర్శి హోవార్డ్ లట్నిక్‌తో జరిగిన ఒక చర్చా కార్యక్రమంలో ఆయన ఈ వ్యాఖ్యలు చేశారు.

ఏఐ కేవలం కొన్ని విధులను మాత్రమే ఆటోమేట్ చేస్తుందని, అయితే ఉద్యోగం ప్రాథమిక ఉద్దేశం, సందర్భం యథాతథంగా ఉంటాయని ఆయన వివరించారు. "ఏఐ ద్వారా కొన్ని పనులు సులభతరం అవుతాయి, కానీ మన ఉద్యోగాల లక్ష్యం మారదు. దీనివల్ల మన పనితీరు మెరుగుపడి, మనమందరం మరింత సమర్థవంతంగా (సూపర్‌ఛార్జ్డ్) తయారవుతాం" అని హువాంగ్ పేర్కొన్నారు. ప్రతి సంస్థ, ప్రతి దేశం ఏఐ సాంకేతికతను అందిపుచ్చుకుంటూనే, ఇతరులపై ఆధారపడకుండా సొంతంగా ఏఐ సామర్థ్యాలను పెంపొందించుకోవాలని ఆయన సూచించారు.

రానున్న కొన్ని ఏళ్లలోనే ఆర్టిఫిషియల్ జనరల్ ఇంటెలిజెన్స్ (ఏజీఐ) అందుబాటులోకి రావచ్చని ఆయన అంచనా వేశారు. ఈ నేపథ్యంలో, ప్రతి దేశం తన ఆర్థిక వ్యవస్థ, పరిశ్రమల పురోగతి కోసం సొంతంగా ఏఐ మౌలిక సదుపాయాలను నిర్మించుకోవాలని పిలుపునిచ్చారు. అమెరికా ఈ ఏడాది ఏఐ మౌలిక సదుపాయాల కల్పన కోసం దాదాపు ఒక ట్రిలియన్ డాలర్ల పెట్టుబడి పెట్టనుందని, దీనివల్ల లక్షలాది నూతన ఉద్యోగ అవకాశాలు లభిస్తాయని ఆయన తెలిపారు. ఏఐని అందిపుచ్చుకోకపోవడమే అసలైన ప్రమాదమని, అలా చేయడం వల్ల సాంకేతికంగా వెనుకబడిపోయే అవకాశం ఉందని హువాంగ్ హెచ్చరించారు.

పౌరుల ప్రయోజనాల దృష్ట్యా ప్రతి దేశం స్వదేశీ డేటా సెంటర్లు, ఏఐ మౌలిక వసతులపై పెట్టుబడులు పెట్టాలన్న హువాంగ్ అభిప్రాయంతో వాణిజ్య కార్యదర్శి హోవార్డ్ లట్నిక్ ఏకీభవించారు.