‘ఇస్లాం శ్రేష్ఠమైన మతం’.. కర్ణాటక మంత్రి వ్యాఖ్యలతో రాజకీయ దుమారం

కర్ణాటక ఉన్నత విద్యాశాఖ మంత్రి బసవరాజ్ రాయరెడ్డి చేసిన వ్యాఖ్యలు రాష్ట్ర రాజకీయాల్లో తీవ్ర దుమారం రేపాయి. ఇస్లాం ఇతర మతాల కంటే శ్రేష్ఠమైనదని ఆయన ప్రశంసించడంపై భారతీయ జనతా పార్టీ (బీజేపీ) తీవ్రంగా స్పందించింది. హిందూ సమాజానికి ఆయన క్షమాపణ చెప్పాలని, లేదంటే మంత్రివర్గం నుంచి వైదొలగాలని డిమాండ్ చేసింది.

కొప్పల్ జిల్లాలోని కుక్నూర్‌లో ముస్లిం సమాజం నిర్వహించిన సామూహిక వివాహాల కార్యక్రమంలో మంత్రి బసవరాజ్ రాయరెడ్డి పాల్గొన్నారు. ప్రవక్త మహమ్మద్ జయంతిని పురస్కరించుకుని ఏర్పాటు చేసిన ఈ వేదికపై ఆయన మాట్లాడుతూ.. "ఇస్లాం ఒక గొప్ప మతం, శ్రేష్ఠమైన ధర్మం. ఇది మానవత్వంతో ప్రారంభమవుతుంది. మతోన్మాదులుగా, కులతత్వవాదులుగా మారకుండా ఎలా జీవించాలో నేర్పుతుంది. అందుకే ఇది ఇతర మతాల కన్నా ఉన్నతమైనది" అని వ్యాఖ్యానించారు. ఇస్లాంపై అపోహలు ప్రచారం చేస్తున్నారని, ఖురాన్‌ను అధ్యయనం చేయాలని తాను భావిస్తున్నానని, అది మానవాళి మొత్తానికి చెందినదని అన్నారు. మక్కాకు హజ్ యాత్ర చేయాలనే కోరిక ఉందని, అయితే అందుకు ఇస్లాం స్వీకరించాల్సి ఉంటుందని కూడా ఆయన పేర్కొన్నారు. తాను గుడులకు, మఠాలకు తరచుగా వెళ్లనని తెలిపారు.

మంత్రి వ్యాఖ్యలపై బీజేపీ తీవ్రస్థాయిలో మండిపడింది. కర్ణాటక ప్రతిపక్ష నేత, బీజేపీ రాష్ట్ర అధ్యక్షుడు ఆర్.అశోక్ మాట్లాడుతూ.. మంత్రి బసవరాజ్ సనాతన ధర్మాన్ని, హిందూ విశ్వాస కేంద్రాలను కించపరిచారని ఆరోపించారు. ముఖ్యమంత్రి డీకే శివకుమార్ వెంటనే స్పందించి, ఆయన చేత హిందువులకు క్షమాపణ చెప్పించాలని, లేదంటే మంత్రివర్గం నుంచి తొలగించాలని డిమాండ్ చేశారు. కాంగ్రెస్ ప్రభుత్వ హిందూ వ్యతిరేక మనస్తత్వానికి ఈ వ్యాఖ్యలు నిదర్శనమని ఆయన విమర్శించారు. ఓటు బ్యాంకు రాజకీయాల కోసమే మంత్రి ఈ వ్యాఖ్యలు చేశారని బీజేపీ అధికార ప్రతినిధి అశోక్ గౌడ ఆరోపించారు.

వివాదం ముదరడంతో మంత్రి బసవరాజ్ రాయరెడ్డి తన వ్యాఖ్యలపై వివరణ ఇచ్చారు. "ఇస్లాంలో ఉన్నతమైన ఆలోచనలు ఉన్నాయని చెప్పాను. కానీ ఇతర మతాలు తక్కువ అని నేను అనలేదు. ఏ మతాన్నీ కించపరచలేదు. అన్ని మతాలూ శ్రేష్ఠమైనవే. నేను అన్ని మతాలను సమానంగా చూస్తాను" అని స్పష్టం చేశారు. ఈ వ్యాఖ్యలతో కర్ణాటకలో అధికార కాంగ్రెస్, ప్రతిపక్ష బీజేపీ మధ్య మత సమానత్వం, లౌకికవాదం వంటి అంశాలపై రాజకీయ మాటల యుద్ధం మరింత తీవ్రమైంది.