నా స్థైర్యం నువ్వే బ్రహ్మణి.. వివాహ వార్షికోత్సవం రోజున లోకేశ్ ఎమోషనల్ పోస్ట్

ఆంధ్రప్రదేశ్ మంత్రి, టీడీపీ వర్కింగ్ ప్రెసిడెంట్ నారా లోకేశ్, ఆయన అర్ధాంగి నారా బ్రహ్మణి నేడు (ఆగస్టు 26) తమ 19వ వివాహ వార్షికోత్సవాన్ని జరుపుకుంటున్నారు. ఈ ప్రత్యేక సందర్భాన్ని పురస్కరించుకుని, వారు సోషల్ మీడియా వేదికగా ఒకరిపై ఒకరు ప్రేమను కురిపించుకున్నారు. వారిద్దరూ పంచుకున్న భావోద్వేగ సందేశాలు ప్రస్తుతం వైరల్ అవుతున్నాయి.

ఈ సందర్భంగా మంత్రి నారా లోకేశ్ తన అర్ధాంగి బ్రహ్మణికి హృదయపూర్వక శుభాకాంక్షలు తెలిపారు. బ్రాహ్మణి పెట్టిన పోస్టును పంచుకుంటూ తన ప్రేమను వ్యక్తం చేశారు. "19 సంవత్సరాలు. 6,940 రోజులు. ప్రతి కష్టసుఖంలో, ప్రతి గెలుపోటములో నువ్వు నాకు అండగా నిలిచావు. ఓర్పు, బలం, బేషరతైన ప్రేమను పంచావు. బ్రహ్మణి, నువ్వు అన్నింటిలోనూ నాకు స్థిరంగా తోడున్నావు. హ్యాపీ యానివర్సరీ. ఇలాంటివి మరెన్నో జరుపుకోవాలి" అంటూ లోకేశ్ తన పోస్టులో పేర్కొన్నారు.

అంతకుముందు నారా బ్రహ్మణి తమ పెళ్లి రోజుపై సంతోషాన్ని పంచుకున్నారు. "హ్యాపీ యానివర్సరీ, మై లవ్. మనం కలిసి 20వ సంవత్సరంలోకి అడుగుపెడుతున్నాం. మనం కలిసి నిర్మించుకున్న ఈ ప్రపంచానికి, పంచుకున్న జ్ఞాపకాలకు, కొనసాగిస్తున్న ఈ ప్రయాణానికి నేను ఎంతగానో కృతజ్ఞురాలిని. ప్రతి ఎత్తుపల్లంలో నువ్వే నాకు అండగా నిలిచావు. భవిష్యత్తులో రాబోయే మరెన్నో సాహసాల కోసం ఆసక్తిగా ఎదురుచూస్తున్నాను. మన దాంపత్య జీవితంలో ఉత్సాహంగా 20వ ఏట అడుగుపెడుతున్నా!" అని బ్రాహ్మణి తన పోస్టులో పేర్కొన్నారు.

2007 ఆగస్టు 26న నారా లోకేశ్, బ్రహ్మణిల వివాహం జరిగింది. వారికి దేవాన్ష్ అనే కుమారుడు ఉన్నాడు. రాజకీయాల్లో ఎంత బిజీగా ఉన్నప్పటికీ, లోకేశ్ తన కుటుంబానికి ఎంతో ప్రాధాన్యత ఇస్తారనే విషయం తెలిసిందే. ఈ దంపతుల అన్యోన్యతకు, వారి ప్రేమ సందేశాలకు అభిమానులు, టీడీపీ కార్యకర్తల నుంచి శుభాకాంక్షలు వెల్లువెత్తుతున్నాయి.