సరైన దుస్తులు ధరించండి: బనియన్, నిక్కరు తొడిగిన ఆప్ ఎమ్మెల్యేపై సీఎం రేఖా గుప్త ఆగ్రహం

ఆమ్ ఆద్మీ పార్టీ (ఆప్) ఎమ్మెల్యే అనిల్ ఝా వత్స్‌పై ఢిల్లీ ముఖ్యమంత్రి రేఖా గుప్తా తీవ్ర ఆగ్రహం వ్యక్తం చేశారు. నియోజకవర్గ ప్రజల ముందు, ముఖ్యంగా మహిళల సమక్షంలో ఆయన బనియన్, నిక్కరు ధరించి కూర్చున్న వీడియో సోషల్ మీడియాలో వైరల్ కావడంతో, ముఖ్యమంత్రి అసెంబ్లీ వేదికగా ఆయన ప్రవర్తనను తప్పుబట్టారు.

వాయువ్య ఢిల్లీలోని కిరారి నియోజకవర్గ ఎమ్మెల్యే అనిల్ ఝా, తన కార్యాలయంలో బనియన్, నిక్కరుతో కుర్చీలో కూర్చుని ఉండటం ఆ వీడియోలో కనిపిస్తోంది. ఒడిలో కాషాయ కండువా వేసుకుని, లక్ష్మీ యోజన పథకానికి సంబంధించిన పత్రాలపై ఆయన సంతకాలు చేస్తున్నారు. ఆ సమయంలో మహిళలతో సహా పలువురు ప్రజలు ఆయన చుట్టూ క్యూలో వేచి ఉన్నారు. ఈ వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.

సోమవారం అసెంబ్లీ వర్షాకాల సమావేశాల సందర్భంగా ఈ అంశాన్ని ప్రస్తావించిన ముఖ్యమంత్రి రేఖా గుప్తా, ఎమ్మెల్యే ప్రవర్తన సిగ్గుచేటని వ్యాఖ్యానించారు. "మీ ప్రవర్తన అత్యంత విచారకరం. మహిళలు పత్రాలపై సంతకాలు చేయించుకోవడానికి వచ్చినప్పుడు కనీసం సభ్యతతో కూడిన వస్త్రధారణ ఉండాలి కదా" అని ఆమె మండిపడ్డారు. ప్రజాప్రతినిధిగా ఇలా వ్యవహరించడం ఆమోదయోగ్యం కాదని, ఆయన శాసనసభ సభ్యత్వాన్ని రద్దు చేయాలని డిమాండ్ చేశారు. అయితే, ముఖ్యమంత్రి వ్యాఖ్యలపై ఆమ్ ఆద్మీ పార్టీ ఎమ్మెల్యేలు సభలో నిరసన వ్యక్తం చేశారు.