భారత మార్కెట్లోకి మోటో ప్యాడ్ 70.. భారీ డిస్‌ప్లే, పవర్‌ఫుల్ బ్యాటరీ!

ప్రముఖ ఎలక్ట్రానిక్ ఉత్పత్తుల తయారీ సంస్థ మోటోరోలా, భారత మార్కెట్లో తన టాబ్లెట్ పోర్ట్‌ఫోలియోను మరింత విస్తరించింది. తాజాగా 'మోటో ప్యాడ్ 70' పేరుతో ఓ సరికొత్త టాబ్లెట్‌ను శనివారం అధికారికంగా విడుదల చేసింది. 12.1 అంగుళాల భారీ డిస్‌ప్లే, శక్తివంతమైన బ్యాటరీ, ఆకర్షణీయమైన ఫీచర్లతో ఈ ట్యాబ్‌ను వినియోగదారుల ముందుకు తెచ్చింది. ప్రత్యేకంగా ఈ టాబ్లెట్ కొనుగోలు చేసిన వారికి బాక్సులోనే 'మోటో పెన్ స్టైలస్'‌ను కూడా ఉచితంగా అందిస్తుండటం విశేషం.

స్పెసిఫికేషన్ల విషయానికొస్తే, మోటో ప్యాడ్ 70లో 90Hz రిఫ్రెష్ రేట్‌తో కూడిన 12.1 అంగుళాల 2.5K డిస్‌ప్లేను అమర్చారు. ఇది 800 నిట్స్ వరకు బ్రైట్‌నెస్‌ను సపోర్ట్ చేస్తుంది. మీడియాటెక్ డైమెన్సిటీ 6400 ప్రాసెసర్‌పై పనిచేసే ఈ ట్యాబ్‌లో 8 GB ర్యామ్, 256 GB వరకు అంతర్గత స్టోరేజ్ ఆప్షన్లు ఉన్నాయి. మైక్రో ఎస్‌డీ కార్డ్ ద్వారా స్టోరేజ్‌ను 2 TB వరకు పెంచుకునే వెసులుబాటు కల్పించారు. 10,200 mAh భారీ బ్యాటరీతో పాటు బాక్సులోనే 68W ఫాస్ట్ చార్జర్‌ను కూడా అందిస్తున్నారు.

వినోదం కోసం డాల్బీ అట్మోస్, హై-రిజల్యూషన్ ఆడియో ట్యూనింగ్‌తో కూడిన నాలుగు స్పీకర్లను పొందుపరిచారు. ఫొటోలు, వీడియోల కోసం వెనుక వైపు 13 MP, సెల్ఫీల కోసం ముందు వైపు 8 MP కెమెరా ఉంది. ఈ టాబ్లెట్ ఆండ్రాయిడ్ 16 ఆపరేటింగ్ సిస్టమ్‌తో వస్తుండగా, భవిష్యత్తులో ఆండ్రాయిడ్ 17 అప్‌డేట్‌తో పాటు మూడేళ్ల పాటు సెక్యూరిటీ ప్యాచ్‌లు అందిస్తామని కంపెనీ హామీ ఇచ్చింది. మోటొరోలా స్మార్ట్ కనెక్ట్ ఫీచర్‌తో ఇతర ఫోన్లు, ల్యాప్‌టాప్‌లకు సులభంగా కనెక్ట్ చేసుకోవచ్చు.

ప్యాంటోన్ టైటాన్ సీ ఏంజెల్ అనే ప్రత్యేకమైన రంగులో లభించే ఈ మోటో ప్యాడ్ 70 ధరను రూ.33,999గా నిర్ణయించారు. ఆగస్టు 15వ తేదీ నుంచి ఫ్లిప్‌కార్ట్, మోటోరోలా అధికారిక వెబ్‌సైట్ సహా దేశవ్యాప్తంగా ఉన్న ప్రముఖ రిటైల్ స్టోర్లలో దీని అమ్మకాలు ప్రారంభమవుతాయని కంపెనీ ఒక ప్రకటనలో వెల్లడించింది.