ఖజానా ఖాళీ.. ఉచిత పథకాలే కారణం: తెలంగాణ హైకోర్టు

తెలంగాణలో అమలు చేస్తున్న ఉచిత పథకాలపై హైకోర్టు తీవ్ర ఆందోళన వ్యక్తం చేసింది. ఈ పథకాల వల్ల రాష్ట్రంలో త్వరలోనే తీవ్రమైన ప్రమాదకర పరిస్థితులు తలెత్తుతాయని హెచ్చరించింది. రాష్ట్ర ఖజానాలో నిధులు లేకపోవడానికి ఈ ఉచిత పథకాలే ప్రధాన కారణమని జస్టిస్ నగేశ్ భీమపాక ధర్మాసనం సంచలన వ్యాఖ్యలు చేసింది.

కంటోన్మెంట్ బోర్డుకు సర్‌ఛార్జి బకాయిల చెల్లింపునకు సంబంధించిన కోర్టు ధిక్కరణ కేసు విచారణ సందర్భంగా కోర్టు ఈ వ్యాఖ్యలు చేసింది. "కోటీశ్వరులకు రైతుబంధు, లగ్జరీ బైక్‌లపై తిరిగే వారికి ఫీజు రీయింబర్స్‌మెంట్ ఎలా ఇస్తారు?" అని ధర్మాసనం ప్రభుత్వాన్ని నిలదీసింది. "ఉచితాల వల్ల గ్రామాల్లో కూలీలు దొరకక రైతులు ఏడుస్తున్నారు. ప్రజలు కష్టపడి పనిచేసే రోజులను వీడియోల్లో చూసుకోవాల్సిన పరిస్థితి వస్తోంది" అని ఆవేదన వ్యక్తం చేసింది. రాష్ట్ర జనాభా కన్నా రేషన్ కార్డుల్లో ఉన్న సభ్యుల సంఖ్య ఎక్కువగా ఉండటంపై ఆశ్చర్యం వ్యక్తం చేసింది.

ఈ కేసులో ఆర్థిక శాఖ ముఖ్య కార్యదర్శి సందీప్ కుమార్ సుల్తానియా కోర్టుకు హాజరయ్యారు. కంటోన్మెంట్ బోర్డుకు రూ. 25.45 కోట్లు విడుదల చేశామని, మిగతా మొత్తాన్ని వాయిదాల్లో చెల్లిస్తామని ఆయన వివరించారు. ఆయన వివరణతో సంతృప్తి చెందిన ధర్మాసనం, వ్యక్తిగత హాజరు నుంచి మినహాయింపు ఇచ్చింది.

ఇదే విచారణలో భాగంగా, పోలీస్ స్టేషన్లలో పనిచేస్తున్న స్వీపర్లకు ప్రభుత్వం నిర్ణయించిన కనీస వేతనాలు చెల్లించాలని హైకోర్టు ఆదేశించింది. నాలుగు వారాల్లోగా ఈ ఆదేశాలు అమలు చేయాలని స్పష్టం చేస్తూ, తదుపరి విచారణను ఈ నెల 19కి వాయిదా వేసింది.