చైనా ఓపెన్‌లో సింధు, ఆయుష్‌ శుభారంభం

చైనా ఓపెన్‌ బ్యాడ్మింటన్‌లో భారత స్టార్‌ షట్లర్‌ పీవీ సింధు రెండో రౌండ్‌కు చేరుకుంది. తొలి రౌండ్‌లో భారత యువ క్రీడాకారిణి ఉన్నతి హూడాపై 21-14, 9-21, 21-10 తేడాతో విజయం సాధించింది. 56 నిమిషాల పాటు సాగిన ఈ మ్యాచ్‌లో రెండో గేమ్‌ను కోల్పోయినా, నిర్ణయాత్మక గేమ్‌లో సింధు పూర్తి ఆధిపత్యం చెలాయించింది. గత ఏడాది ఇదే టోర్నీలో ఉన్నతి చేతిలో ఎదురైన ఓటమికి ఈ విజయంతో సింధు ప్రతీకారం తీర్చుకున్నట్లైంది.

జపాన్‌ ఓపెన్‌లో టైటిల్‌ గెలిచిన జోరును కొనసాగిస్తున్న సింధు.. రెండో రౌండ్‌లో చైనా స్టార్‌, నాలుగో సీడ్‌ చెన్‌ యుఫేతో తలపడనుంది. ఇటీవల జపాన్‌ ఓపెన్‌లో చెన్‌ను ఓడించిన ఆత్మవిశ్వాసంతో ఈ మ్యాచ్‌కు సిద్ధమవుతోంది.

పురుషుల సింగిల్స్‌లో యువ ఆటగాడు ఆయుష్‌ శెట్టి సంచలన విజయం నమోదు చేశాడు. ప్రపంచ 11వ ర్యాంకర్‌, ఇండోనేషియా క్రీడాకారుడు అల్వీ ఫర్హాన్‌ను 21-17, 5-21, 21-17తో ఓడించి ప్రీక్వార్టర్స్‌కు చేరాడు. 2023 ప్రపంచ జూనియర్‌ ఛాంపియన్‌షిప్‌ సెమీఫైనల్లో ఎదురైన ఓటమికి ఈ విజయంతో ప్రతీకారం తీర్చుకున్నాడు.

అయితే డబుల్స్‌లో భారత్‌కు నిరాశ ఎదురైంది. మిక్స్‌డ్‌ డబుల్స్‌లో రోహన్‌ కపూర్‌-రుత్విక శివానీ గడ్డె, ధ్రువ్‌ కపిలా-తనీషా క్రాస్టో జోడీలు తొలి రౌండ్‌లోనే నిష్క్రమించాయి. పురుషుల డబుల్స్‌లో ఎం.ఆర్‌.అర్జున్‌-హరిహరన్‌ అంసకరుణన్‌ జోడీ కూడా ఓటమితో టోర్నీకి వీడ్కోలు పలికింది. కాగా, తర్వాత జరిగే పురుషుల సింగిల్స్‌ తొలి రౌండ్‌లో లక్ష్యసేన్‌ జపాన్‌కు చెందిన యుషి తనాకాతో తలపడనున్నాడు.