సిక్సర్ల మోజు తగ్గించుకోవాలి.. వైభవ్, అభిషేక్‌పై బీసీసీఐ ఫోకస్!

ఇంగ్లండ్‌తో జరుగుతున్న టీ20 సిరీస్‌లో భారత జట్టు పేలవ ప్రదర్శన నేపథ్యంలో యువ ఓపెనర్లు అభిషేక్ శర్మ, వైభవ్ సూర్యవంశీ ఆటతీరుపై బీసీసీఐ ప్రత్యేక దృష్టి సారించినట్లు తెలుస్తోంది. ముఖ్యంగా వీరిద్దరి దూకుడు బ్యాటింగ్, భారీ షాట్లపై ఆధారపడే ధోరణిని బోర్డు నిశితంగా పరిశీలిస్తున్నట్లు సమాచారం. ‘‘అభిషేక్, వైభవ్‌కు సిక్సర్లు బాదే సామర్థ్యం అద్భుతంగా ఉంది. కానీ ఆ ఉత్సాహాన్ని నియంత్రించుకోవడం కూడా నేర్చుకోవాలి’’ అని బీసీసీఐకి చెందిన ఓ అధికారి వ్యాఖ్యానించినట్లు పలు కథనాలు పేర్కొన్నాయి.

15 ఏళ్ల వయసులోనే భారత్ తరఫున అరంగేట్రం చేసిన వైభవ్ సూర్యవంశీ ఇప్పటివరకు ఇంగ్లండ్ సిరీస్‌లో 14, 13, 15 పరుగులకే పరిమితమయ్యాడు. అయితే ఐపీఎల్-2026లో రాజస్థాన్ రాయల్స్ తరఫున 776 పరుగులు, 72 సిక్సర్లతో అదరగొట్టిన అతడు ఆరెంజ్ క్యాప్‌తో పాటు పలు అవార్డులు కూడా గెలుచుకున్నాడు. మరోవైపు అభిషేక్ శర్మ మాత్రం ఇంగ్లండ్ సిరీస్‌లో 59, 43, 10, 16 పరుగులు చేసినా మ్యాచ్‌ను మలుపుతిప్పే ఇన్నింగ్స్ ఆడలేకపోయాడు. దీంతో యువ ఓపెనర్ల దూకుడుతో పాటు పరిస్థితులకు తగ్గట్టుగా ఇన్నింగ్స్‌ను నిర్మించుకునే నైపుణ్యాన్ని అలవర్చుకోవాల్సిన అవసరం ఉందని బీసీసీఐ భావిస్తున్నట్లు సమాచారం.