మంత్రి ఆనం రామనారాయణరెడ్డి పుట్టినరోజు... కేక్ కట్ చేయించిన సీఎం చంద్రబాబు

ఇవాళ రాష్ట్ర మంత్రి ఆనం రామనారాయణరెడ్డి పుట్టినరోజు జరుపుకుంటున్న సందర్భంగా ముఖ్యమంత్రి చంద్రబాబు శుభాకాంక్షలు తెలిపారు. కేబినెట్ సమావేశం ముగిసిన అనంతరం కాన్ఫరెన్స్ హాలులో మంత్రి పుట్టినరోజు వేడుకను నిర్వహించారు. ఈ సందర్భంగా ముఖ్యమంత్రే స్వయంగా ఆనం రామనారాయణరెడ్డితో కేక్ కట్ చేయించారు.

అనంతరం ఆనంకు కేక్ తినిపించి, ఆయన ఆయురారోగ్యాలతో వర్ధిల్లాలని చంద్రబాబు ఆకాంక్షించారు. ఈ వేడుకతో కాన్ఫరెన్స్ హాలులో సందడి వాతావరణం నెలకొంది. ఈ కార్యక్రమంలో పాల్గొన్న ఇతర మంత్రులు కూడా ఆనం రామనారాయణరెడ్డికి శుభాకాంక్షలు తెలియజేశారు. ప్రభుత్వ కార్యక్రమాలతో బిజీగా ఉన్నప్పటికీ, సహచర మంత్రి పుట్టినరోజును గుర్తుపెట్టుకుని సీఎం చంద్రబాబు వేడుక జరపడం పట్ల పలువురు హర్షం వ్యక్తం చేశారు.