మహా కూటమిలో ముసలం.. మనం నిజంగా కలిసే ఉన్నామా? అంటూ ఉద్ధవ్ ఠాక్రే ఆవేదన!
- మహా వికాస్ అఘాడీ కీలక సమావేశానికి 23 మంది ఎమ్మెల్యేల గైర్హాజరు
- హాజరుకాని వారిలో శరద్ పవార్, జయంత్ పాటిల్, నానా పటోలే
- ఆరుగురు శివసేన ఎంపీలు షిండే వర్గంలో చేరిన కొన్నాళ్లకే ఈ పరిణామం
- మహా కూటమి భవిష్యత్తుపై మరింత బలపడుతున్న సందేహాలు
ఈ సమావేశానికి కాంగ్రెస్ నేతలు నానా పటోలే, విజయ్ వడెట్టివార్ కూడా హాజరు కాలేదు. విజయ్ వడెట్టివార్ అనారోగ్యంతో ఉన్నారని ఆయన కార్యాలయం తెలిపింది. అయితే, కాంగ్రెస్ రాష్ట్ర యూనిట్ చీఫ్ హర్షవర్ధన్ సప్కల్, శివసేన (యూబీటీ) నేత సంజయ్ రౌత్ వంటి వారు హాజరయ్యారు. ఇటీవలే ఉద్ధవ్ ఠాక్రే వర్గానికి చెందిన ఆరుగురు ఎంపీలు ఏక్నాథ్ షిండే వర్గంలో చేరిన నేపథ్యంలో ఈ పరిణామం జరగడం ఎంవీఏ భవిష్యత్తును ప్రశ్నార్థకంగా మార్చింది.
ఈ పరిణామాలపై ఉద్ధవ్ ఠాక్రే తీవ్ర ఆవేదన వ్యక్తం చేశారు. 'మనం నిజంగా కలిసే ఉన్నామా?' అని ఆయన ప్రశ్నించారు. పార్టీ ఫిరాయించిన ఎంపీల గురించి మాట్లాడుతూ.. "వెళ్లిపోయిన వారిని వెళ్లనివ్వండి. మనతో ఉన్నవారిపై దృష్టి పెడదాం" అని నేతలకు పిలుపునిచ్చారు. అదే సమయంలో "మనం కలిసి ఉన్నామని చెబుతున్నాం. కానీ సభలో మహా వికాస్ అఘాడీగా మనం ఐక్యంగా ఉన్నామా? సమస్యలను కలిసికట్టుగా లేవనెత్తుతున్నామా?" అని తన అసంతృప్తిని వెళ్లగక్కారు. ఎంవీఏ ఇప్పటికీ ఒక పెద్ద శక్తి అని, సభ్యులందరూ కలిసి పనిచేయాలని, ఉమ్మడి సమావేశాలు, ర్యాలీలు నిర్వహించి ఐక్యతను ప్రదర్శించాలని ఆయన కోరారు.
వాస్తవానికి మూడు రోజుల క్రితం ప్రారంభమైన అసెంబ్లీ వర్షాకాల సమావేశాల కోసం వ్యూహరచన చేసేందుకు ఈ భేటీని ఏర్పాటు చేశారు. అయితే, ఆరుగురు ఎంపీల తిరుగుబాటు తర్వాత జరుగుతున్న ఈ సమావేశం కూటమి ఐక్యతకు పరీక్షగా నిలిచింది. కానీ, కీలక నేతలు గైర్హాజరు కావడంతో కూటమి ఈ పరీక్షలో విఫలమైనట్లేనని విశ్లేషకులు భావిస్తున్నారు.
2019 నవంబర్లో ఏర్పడిన నాటి నుంచి ఎంవీఏ స్థిరత్వంపై అనుమానాలు వెంటాడుతూనే ఉన్నాయి. గట్టి హిందుత్వ భావజాలం ఉన్న శివసేన, లౌకికవాద పార్టీలైన కాంగ్రెస్, ఎన్సీపీలు కలిసి కూటమిగా ఏర్పడటమే అప్పట్లో అందరినీ ఆశ్చర్యపరిచింది. 2019 అసెంబ్లీ ఎన్నికల తర్వాత ముఖ్యమంత్రి పదవి విషయంలో బీజేపీతో విభేదించి శివసేన బయటకు రావడంతో ఈ కూటమి పురుడుపోసుకుంది. బీజేపీని అధికారానికి దూరం పెట్టాలనే ఏకైక లక్ష్యంతోనే ఈ అవకాశవాద కూటమి ఏర్పడిందని విమర్శలు ఉన్నాయి. గతంలో 2022 జూన్లో ఏక్నాథ్ షిండే తిరుగుబాటుతో శివసేన, 2023 జూన్లో అజిత్ పవార్ తిరుగుబాటుతో ఎన్సీపీ విచ్ఛిన్నమయ్యాయి. ఇప్పుడు మరోసారి ఉద్ధవ్ వర్గం నుంచి ఎంపీలు వెళ్లిపోవడం, కీలక నేతలు సమావేశానికి రాకపోవడంతో మహా కూటమి పతనం అంచున ఉందనే వాదనలు బలపడుతున్నాయి.
