బిడ్డ ఎదుగుతుంటే ఆనందమే.. ఇక నేను వెనకుండడమే సబబు: చిరంజీవి
- 'పెద్ది' చిత్రంలో చరణ్ నటించలేదు, జీవించాడు అని కొనియాడిన మెగాస్టార్ చిరంజీవి
- ఇది నేషనల్ అవార్డు స్థాయి నటన అని ప్రశంసల వర్షం
- షూటింగ్లో చరణ్కు గాయం కావడం చూసి తన తండ్రి మాటలు గుర్తొచ్చాయంటూ ఉద్వేగం
- దర్శకుడు బుచ్చిబాబు, నిర్మాత సతీష్ కిలారు ధైర్యాన్ని ప్రత్యేకంగా అభినందించిన చిరు
- కష్టపడితేనే ఫలితం ఉంటుందని, దానికి షార్ట్కట్లు లేవని స్పష్టం
ఈ సినిమా కేవలం ఒక చిత్రంలా కాకుండా, గిరిజనుల జీవన విధానాన్ని, వారి ఆవేదనను, పోరాటాన్ని కళ్లకు కట్టినట్లు చూపించిందని చిరంజీవి అన్నారు. "సినిమా చూస్తున్నప్పుడు ఒక ట్రాన్స్లోకి వెళ్లిపోయాను. ఎన్నోచోట్ల పెద్ది పాత్రతో పాటు ప్రయాణించి, ఆ బాధను అనుభవించాను. ఇంత పవర్ఫుల్, ఎమోషనల్ సబ్జెక్ట్ను ఎంచుకుని, దానికి చరణ్ న్యాయం చేస్తాడని నమ్మిన దర్శకుడు బుచ్చిబాబును మనస్ఫూర్తిగా అభినందిస్తున్నాను. ఇది ఒక మట్టి కథ, మట్టి మనుషుల కథ. బుచ్చిబాబు లాంటి మట్టిలో మాణిక్యాలను వెలికితీసి, ఇండస్ట్రీకి బహుమతిగా ఇచ్చిన గురువు సుకుమార్కు నా అభినందనలు" అని చిరు పేర్కొన్నారు. బడ్జెట్ గురించి వెనకాడకుండా, దర్శకుడి విజన్ను నమ్మి ఇంత భారీ చిత్రాన్ని నిర్మించిన నిర్మాత సతీష్ కిలారు ధైర్యాన్ని ఆయన ప్రత్యేకంగా కొనియాడారు.
ఈ సందర్భంగా, చరణ్ పడిన కష్టాన్ని వివరిస్తూ చిరంజీవి భావోద్వేగానికి లోనయ్యారు. "ఒక స్టార్ కొడుకుగా పుట్టినా, చరణ్ కష్టాన్నే నమ్ముకున్నాడు. ఈ సినిమా కోసం ఉదయం, సాయంత్రం కఠినమైన వ్యాయామాలు చేసేవాడు. ఒకరోజు షూటింగ్లో చరణ్ కంటికి దెబ్బ తగిలిందని ఫోన్ వచ్చింది. పంపిన ఫోటో చూసి కన్ను పోయిందేమోనని భయపడ్డాం. వైద్యులు కనుగుడ్డుకు ప్రమాదం తప్పిందని చెప్పాక ఊపిరి పీల్చుకున్నాం. ఆ సమయంలో నాకు మా నాన్నగారు గుర్తొచ్చారు" అని అన్నారు.
"1983లో 'గూండా' సినిమా షూటింగ్లో, రన్నింగ్ ట్రైన్ కింద నేను వేలాడుతూ ఒక ఫీట్ చేశాను. అది చూసి నాన్న కంగారుపడి, 'ఇంత కష్టపడాలా? రేపు నీకు కొడుకు పుట్టి, వాడు ఇలాంటి కష్టాలు పడితే నా బాధేంటో నీకు తెలుస్తుందిరా' అన్నారు. ఇన్నాళ్లకు, చరణ్కు దెబ్బ తగిలినప్పుడు నాన్న ఆవేదన ఏంటో నాకు తెలిసొచ్చింది. ఆయన నోటి వాక్యమే నిజమైంది. కష్టపడకుండా ఏదీ రాదు, దానికి అడ్డదారులు లేవు. చరణ్ ఆ కష్టానికి ప్రతిఫలంగానే ఈ రోజు మీ అందరి మన్ననలు పొందుతున్నాడు" అని చిరంజీవి ఉద్వేగంగా చెప్పారు.
ఈ చిత్రంలో కీలక పాత్ర పోషించిన జగపతిబాబు ఆహార్యం, నటన అద్భుతమని, శివరాజ్కుమార్ తన హుందాతనంతో పాత్రకు నిండుతనం తెచ్చారని అన్నారు. ఇక సంగీత దర్శకుడు ఏఆర్ రెహమాన్ తన సంగీతంతో సినిమాకు ప్రాణప్రతిష్ఠ చేశారని, సినిమాటోగ్రాఫర్ రత్నవేలు మునుపెన్నడూ చూడని విజువల్ వండర్ సృష్టించారని సాంకేతిక నిపుణులను కూడా అభినందించారు.
"ఇటీవల ఢిల్లీలో జరిగిన ఓ కార్యక్రమంలో చరణ్ను 'న్యూ ఏజ్ మెగాస్టార్' అని సంబోధించారు. బిడ్డలు మనకంటే ముందుకెళుతుంటే ఆ ఆనందమే వేరు. ఇప్పుడు చరణ్ను ముందుంచి, నేను వెనుక ఉండటమే సబబు. ఈ సినిమాతో పూర్తిస్థాయిలో పుత్రోత్సాహం పొందుతున్నాను. పనిలోనే ఆనందం, శక్తి ఉంటాయి. అందుకే చివరి శ్వాస వరకు నటిస్తూనే ఉంటాను" అని చెప్పారు.
