బెంగళూరులో దారుణం: మద్యం తాగొద్దన్న మహిళను చంపేసిన కూతురు, మనవడు

మద్యం మానుకోవాలని హితవు పలికినందుకు ఓ వృద్ధురాలిని ఆమె కూతురు, మనవడు అత్యంత పాశవికంగా హత్య చేసిన ఘటన బెంగళూరులోని కెంగేరిలో చోటుచేసుకుంది. 70 ఏళ్ల వృద్ధురాలు అని కూడా చూడకుండా క్రికెట్ బ్యాట్, కర్రలతో కొట్టి ప్రాణాలు తీశారు. ఈ దారుణానికి ఒడిగట్టిన నిందితులను పోలీసులు అరెస్ట్ చేశారు.

పోలీసుల కథనం ప్రకారం, హసన్ జిల్లాకు చెందిన జయమ్మ (70) అనే వృద్ధురాలికి, ఆమె కుమార్తె భాగ్యలక్ష్మి (49), మనవడు కుశాల్ (26)తో మద్యం విషయమై తరచూ వివాదాలు తలెత్తేవి. వీరు కెంగేరిలోని సుభాష్ నగర్‌లో గల మోనిషా ఎన్‌క్లేవ్ అపార్ట్‌మెంట్‌లో నివాసం ఉంటున్నారు. గత కొన్ని రోజులుగా జయమ్మ కూడా వారితోనే ఉంటున్నారు. అయితే, తల్లీకొడుకులు నిత్యం మద్యం సేవించి అపార్ట్‌మెంట్‌లో గొడవ పడుతుండటంతో గతంలో స్థానికులు వారిని హెచ్చరించారు. ఈ క్రమంలో కుటుంబ సభ్యులు కుశాల్‌ను రిహాబిలిటేషన్ సెంటర్ పంపించగా, కొన్ని వారాల క్రితమే తిరిగి వచ్చిన అతను మళ్ళీ మద్యం సేవించడం ప్రారంభించాడు.

జూన్ 22వ తేదీ తెల్లవారుజామున 5 గంటల నుంచి 8 గంటల మధ్య మద్యం తాగడంపై జయమ్మ అభ్యంతరం వ్యక్తం చేయడంతో గొడవ తీవ్రరూపం దాల్చింది. ఈ నేపథ్యంలో ఆవేశానికి గురైన భాగ్యలక్ష్మి, కుశాల్ కలిసి ఆమెపై క్రికెట్ బ్యాట్, కర్రలతో విచక్షణారహితంగా దాడి చేశారు. వృద్ధురాలి కేకలు విన్న స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు పరిశీలించగా, హాల్‌లోని బాత్రూమ్ సమీపంలో జయమ్మ మృతదేహం లభ్యమైంది.

దీనిపై కెంగేరి పోలీసులు భారతీయ న్యాయ సంహిత (బీఎన్ఎస్) కింద హత్య కేసు నమోదు చేశారు. నిందితులను అదుపులోకి తీసుకుని తదుపరి విచారణ చేపట్టినట్లు బెంగళూరు సౌత్-వెస్ట్ డివిజన్ పోలీసులు వెల్లడించారు.