ఆంధ్రా కేజీఎఫ్ 'జొన్నగిరి'.. రేపు గోల్డ్ మైనింగ్ ప్రాజెక్టు ప్రారంభించనున్న సీఎం చంద్రబాబు

ఒకప్పుడు బంగారు గని అనగానే కర్ణాటకలోని కేజీఎఫ్ మాత్రమే గుర్తుకొచ్చేది. ఇప్పుడు ఆ చరిత్ర మారనుంది. రాయలసీమలోని కర్నూలు జిల్లా జొన్నగిరి, దేశ పసిడి పటంలో తనకంటూ ఒక ప్రత్యేక స్థానాన్ని సంపాదించుకోనుంది. కరవు నేలగా పేరున్న ఈ ప్రాంతం, ఇప్పుడు బంగారం ఉత్పత్తికి ప్రధాన కేంద్రంగా రూపాంతరం చెందనుంది. దేశంలోనే ప్రైవేట్ రంగంలో అతిపెద్ద గోల్డ్ మైనింగ్ ప్రాజెక్టు ఇక్కడ ప్రారంభానికి సిద్ధమైంది. ఈ ప్రాజెక్టును ముఖ్యమంత్రి చంద్రబాబు రేపు బుధవారం (జూన్ 24) లాంఛనంగా ప్రారంభించనున్నారు.

కర్నూలు జిల్లా తుగ్గలి మండలంలోని జొన్నగిరిలో జియో మైసూర్ సర్వీసెస్ ఇండియా ప్రైవేట్ లిమిటెడ్, డెక్కన్ గోల్డ్ మైన్స్ లిమిటెడ్ సంస్థలు సంయుక్తంగా ఈ ప్రాజెక్టును నెలకొల్పాయి. రూ.405 కోట్ల భారీ పెట్టుబడితో ఈ బంగారం శుద్ధి కర్మాగారాన్ని ఏర్పాటు చేశాయి. ఇందుకోసం ప్రభుత్వం 1,500 ఎకరాల భూమిని కేటాయించగా, మొదటి దశలో 600 ఎకరాల్లో తవ్వకాలు, ప్రాసెసింగ్ పనులు చేపట్టనున్నారు. ఇప్పటికే ట్రయల్ రన్స్ విజయవంతంగా పూర్తి చేసుకున్న ఈ ప్లాంట్‌లో, ప్రారంభోత్సవం అనంతరం పూర్తిస్థాయి ఉత్పత్తి మొదలవుతుంది. ఈ సందర్భంగా ప్లాంట్ విస్తరణలో భాగంగా రెండో యూనిట్‌కు కూడా ముఖ్యమంత్రి చంద్రబాబు శంకుస్థాపన చేస్తారు.

ఈ ప్రాజెక్ట్ ద్వారా తొలి ఏడాదిలో 400 కిలోల బంగారం ఉత్పత్తి చేయాలని లక్ష్యంగా పెట్టుకున్నారు. వచ్చే ఏడాది నుంచి ఈ ఉత్పత్తిని 900 కిలోలకు, ఆ తర్వాత దశలవారీగా ప్లాంట్ సామర్థ్యాన్ని పెంచుతూ ఏటా 2 టన్నుల బంగారం వెలికితీయాలని ప్రణాళికలు సిద్ధం చేశారు. ఈ ప్రాజెక్టు ద్వారా ప్రత్యక్షంగా, పరోక్షంగా సుమారు 700 మందికి ఉపాధి అవకాశాలు లభించనున్నాయి.

ఈ ప్రాజెక్టు కేవలం ఉపాధి కల్పనకే కాకుండా, రాష్ట్ర ప్రభుత్వ ఖజానాకు కూడా ఆదాయాన్ని అందించనుంది. వెలికితీసిన బంగారం విలువలో 4 శాతం రాయల్టీ రూపంలో రాష్ట్రానికి లభిస్తుంది. అంచనాల ప్రకారం, తొలి ఏడాది ఉత్పత్తి చేసే 400 కిలోల బంగారంతో రూ.57 కోట్లు, ఆ తర్వాత 900 కిలోల ఉత్పత్తితో ఏటా రూ.144 కోట్ల వరకు ప్రభుత్వానికి ఆదాయం సమకూరనుంది. ప్రాజెక్టుకు అవసరమైన నీటి కోసం హంద్రీనీవా సుజల స్రవంతి నుంచి 0.021 టీఎంసీల నీటిని 18 కిలోమీటర్ల పైపులైన్ ద్వారా వినియోగించనున్నారు.

సీఎం పర్యటన వివరాలు
బుధవారం ఉదయం 10 గంటలకు అమరావతి నుంచి బయలుదేరనున్న సీఎం చంద్రబాబు, 11:30 గంటలకు జొన్నగిరికి చేరుకుంటారు. 11:45 గంటలకు మొదటి యూనిట్‌ను ప్రారంభించి, రెండో యూనిట్‌కు శంకుస్థాపన చేస్తారు. అనంతరం మధ్యాహ్నం 12:20 గంటలకు బహిరంగ సభలో ప్రసంగిస్తారు. సాయంత్రం 3 గంటలకు పత్తికొండ నియోజకవర్గ టీడీపీ నాయకులు, కార్యకర్తలతో సమావేశం కానున్నారు. ఈ ప్రాజెక్టుతో జొన్నగిరి ప్రాంతం స్వర్ణగిరిగా మారుతుందని, రాయలసీమ ఆర్థిక ముఖచిత్రంలో ఇదొక కీలక మైలురాయిగా నిలుస్తుందని నిపుణులు భావిస్తున్నారు.