బాలుడిపై దాడిచేసి తొక్కిపారేసిన ఆవు.. రక్షించబోయిన వ్యక్తిపైనా దాడి

దక్షిణ ఢిల్లీలోని తుగ్లకాబాద్ ఎక్స్‌టెన్షన్ పరిధిలో ఉన్న గల్లీ నంబర్ 10లో ఒక ఆవు చిన్న పిల్లాడిపై దాడి చేసింది. మున్సిపల్ కార్పొరేషన్ ఆఫ్ ఢిల్లీ సెంట్రల్ జోన్ పరిధిలోకి వచ్చే ఈ ఇరుకైన సందులో బాలుడు నడుచుకుంటూ వెళ్తుండగా, అక్కడ నిలబడి ఉన్న ఆవు ఒక్కసారిగా అతడిపైకి దూసుకొచ్చింది. బాలుడిని కింద పడేసి, కొమ్ములతో పొడుస్తూ, కాళ్లతో విచక్షణారహితంగా తొక్కిపారేసింది. ఈ భయానక దృశ్యాలన్నీ అక్కడే ఉన్న సీసీటీవీ కెమెరాలో రికార్డయ్యాయి.

దాడి జరుగుతున్న సమయంలో పక్కనే ఉన్న ఒక వ్యక్తి ప్రాణాలకు తెగించి బాలుడిని కాపాడేందుకు ముందుకు వచ్చాడు. ఆవు దాడి చేస్తున్నా లెక్కచేయకుండా బాలుడిని తన చేతుల్లోకి తీసుకున్నాడు. అయితే, ఆవు అతడిపైనా దాడికి దిగింది. ఆవు బలంగా ఢీకొట్టడంతో ఆ వ్యక్తి బాలుడితోపాటు కిందపడిపోయాడు. ఈ లోగా చుట్టుపక్కల ఉన్నవారు కేకలు వేస్తూ కర్రలతో ఆవును భయపెట్టి వెళ్లగొట్టారు. దీంతో ఆ బాలుడికి, అతడిని కాపాడిన వ్యక్తికి ప్రాణాపాయం తప్పింది. తీవ్రంగా గాయపడిన బాలుడిని స్థానికులు తక్షణమే ఆసుపత్రికి తరలించగా, ప్రస్తుతం అతను చికిత్స పొందుతూ కోలుకుంటున్నాడు.