రూ.3 కోట్ల లాటరీ గెలుచుకున్న క్యాబ్ డ్రైవర్.. తండ్రి కలను నెరవేరుస్తానంటూ ఆనందం

హిమాచల్ ప్రదేశ్‌కు చెందిన ఒక సాధారణ ట్యాక్సీ డ్రైవర్ రాత్రికి రాత్రే కోటీశ్వరుడిగా మారారు. పంజాబ్ ప్రభుత్వం నిర్వహించిన ‘డియర్ సమ్మర్ స్పెషల్ బంపర్ లాటరీ’లో ఆయన ఏకంగా రూ.3 కోట్ల ప్రథమ బహుమతిని గెలుచుకున్నారు. కాంగ్రా జిల్లా సతానా గ్రామానికి చెందిన కల్యాణ్ చంద్ ఈ జాక్‌పాట్ విజేతగా నిలిచారు.

వివరాల్లోకి వెళితే.. కల్యాణ్ చంద్ ఇటీవలే ఒక ప్రయాణికుడిని పంజాబ్‌లోని బటిండాలో దింపేందుకు తన ట్యాక్సీలో వెళ్లారు. అక్కడ ఒకే నంబర్‌తో ఉన్న రెండు లాటరీ టికెట్లను ఒక్కోటి రూ.500 చొప్పున కొనుగోలు చేశారు. తాజాగా లాటరీ ఫలితాలు విడుదల కాగా, ఆయన కొనుగోలు చేసిన ఒక టికెట్‌ను మొదటి బహుమతి వరించింది. దీంతో ఆయన సంతోషానికి అవధుల్లేకుండా పోయాయి.

ప్రస్తుతం నెలకు రూ.15,000 నుంచి రూ.16,000 వరకు సంపాదిస్తున్న తనకు ఇంత పెద్ద మొత్తంలో నగదు బహుమతి రావడంపై కల్యాణ్ చంద్ హర్షం వ్యక్తం చేశారు. "ఈ డబ్బుతో నా తండ్రి చిరకాల కలను నెరవేరుస్తాను. మా గ్రామంలో ఉన్న రెండు గదుల ఇంటిని పునర్నిర్మిస్తాను" అని ఆయన తెలిపారు. లాటరీ గెలిచిన విషయాన్ని నిర్ధారించుకున్న అనంతరం, కల్యాణ్ తన కుటుంబ సభ్యులతో కలిసి బటిండా వెళ్లి బహుమతి మొత్తం కోసం దరఖాస్తు చేసుకున్నారు.