హిట్లర్‌ పేరుతో పిజ్జా ఆర్డర్‌.. చివరకు ఏమైందంటే..!

రెస్టారెంట్‌లో సరదాగా చేసిన పని ఓ యువకుడిని జైలుపాలు చేసింది. పిజ్జా ఆర్డర్‌ ఇస్తూ తన పేరుకు బదులు ఓ నియంత పేరు రాయడం భారీ మూల్యం చెల్లించుకునేలా చేసింది. ఈ ఘటన రష్యాలో వెలుగుచూసింది. ప్రస్తుతం ఆ విద్యార్థికి జైలు శిక్ష పడటంతో పాటు కాలేజీ నుంచి బహిష్కరణ ముప్పు కూడా ఎదురవుతోంది.

రష్యాలోని నిజ్నీ టాగిల్‌ నగరానికి చెందిన 18 ఏళ్ల విద్యార్థి టిమోఫే వాఖోనిన్‌ స్థానిక షాపింగ్‌ సెంటర్‌ నుంచి పిజ్జా ఆర్డర్‌ చేశాడు. అయితే తన అసలు పేరుకు బదులు అడాల్ఫ్‌ హిట్లర్‌ పేరు ఉపయోగించాడు. విషయం బయటకు రావడంతో పోలీసులు కేసు నమోదు చేశారు. నాజీ చిహ్నాలు, భావజాలాన్ని ప్రోత్సహించారనే ఆరోపణలు మోపారు.

ఈ ఘటనపై అధికార పార్టీ యునైటెడ్‌ రష్యా నేత అలెగ్జీ స్వాలోవ్‌ పోలీసులకు ఫిర్యాదు చేశారు. పోలీసులు ఆ విద్యార్థిని కాలేజీ ప్రాంగణంలోనే అదుపులోకి తీసుకున్నారు. కోర్టులో హాజరుపర్చగా అతడికి ఐదు రోజుల జైలు శిక్ష విధించారు. విచారణలో తాను చేసిన పనికి పశ్చాత్తాపం వ్యక్తం చేశాడని అధికారులు తెలిపారు. కన్నీళ్లు పెట్టుకుంటూ క్షమాపణ చెప్పినట్లు వెల్లడించారు. తన చర్యల వల్ల ఎవరి మనోభావాలు దెబ్బతిన్నా క్షమించాలని కోరినట్లు చెప్పారు.

దర్యాప్తులో మరో విషయం కూడా బయటపడింది. విద్యార్థి తన డెస్క్‌పై నిషేధిత గుర్తులు గీసినట్లు గుర్తించారు. వాటి ఫొటోలు తీసి ఆన్‌లైన్‌ చాట్‌ గ్రూపుల్లో పంచుకున్నట్లు అధికారులు తెలిపారు. అయితే తాను చేసిన పనుల అర్థం పూర్తిగా తెలియదని విద్యార్థి వివరణ ఇచ్చినట్లు సమాచారం.