న్యూయార్క్ టైమ్స్ స్క్వేర్‌లో కలకలం.. నిక్స్ ఛాంపియన్‌షిప్ వేడుకల వేళ పేలిన తుపాకులు!

అమెరికాలోని అత్యంత రద్దీ ప్రాంతమైన న్యూయార్క్ టైమ్స్ స్క్వేర్‌లో గురువారం మధ్యాహ్నం తుపాకి కాల్పులు కలకలం సృష్టించాయి. న్యూయార్క్ నిక్స్ జట్టు 53 ఏళ్ల తర్వాత బాస్కెట్‌బాల్ ఛాంపియన్‌షిప్ కైవసం చేసుకోవడంతో లోయర్ మాన్‌హట్టన్‌లో పెద్ద ఎత్తున విజయోత్సవ పరేడ్ నిర్వహించారు. ఈ చారిత్రాత్మక వేడుకలు ముగిసిన కొన్ని గంటల్లోనే.. మధ్యాహ్నం సుమారు మూడు గంటల నలభై నిమిషాల ప్రాంతంలో టైమ్స్ స్క్వేర్ కూడలి వద్ద ఒక్కసారిగా కాల్పులు జరిగాయి. అంతవరకు ఎంతో ఉత్సాహంగా వేడుకలు జరుపుకుంటున్న పర్యాటకులు, స్థానికులు ప్రాణభయంతో చెల్లాచెదురుగా పరుగులు తీశారు.

కొందరు దుండగుల మధ్య జరిగిన ఘర్షణే ఈ కాల్పులకు దారితీసినట్లు ప్రాథమిక నివేదికల ద్వారా తెలుస్తోంది. నల్లటి దుస్తులు ధరించిన ఇద్దరు వ్యక్తులు రద్దీగా ఉన్న కూడలిలోకి ప్రవేశించి కాల్పులకు తెగబడ్డారు. ఈ ఘటనతో సమీపంలోని షాపింగ్ మాల్స్ తమ తలుపులను మూసివేశాయి. కాల్పుల్లో గాయపడిన ఒక వ్యక్తిని అధికారులు అత్యవసరంగా స్థానిక ఆసుపత్రికి తరలించారు.  

నగరంలో పరేడ్ భద్రత కోసం అప్పటికే దాదాపు పది వేల మంది పోలీసులను మోహరించడంతో శాంతిభద్రతల విభాగం వెంటనే రంగంలోకి దిగింది. కాల్పులు జరిపి పారిపోతున్న ఒక నిందితుడిని పోలీసులు వెంటాడి మరీ పట్టుకుని అదుపులోకి తీసుకున్నారు. మిగిలిన నిందితుల కోసం గాలింపు చర్యలు ముమ్మరం చేశారు. గత వారాంతంలో కూడా టైమ్స్ స్క్వేర్ సమీపంలో జరిగిన కాల్పుల ఘటనలో పదిహేడేళ్ల వ్యక్తి గాయపడిన విషయం తెలిసిందే.