స్విస్ బ్యాంకుల్లో త‌గ్గిన ఇండియ‌న్ మ‌నీ.. ప్ర‌స్తుతం అక్క‌డ మ‌నోళ్ల మొత్తం సొమ్ము ఎంత ఉందంటే..!

స్విస్ బ్యాంకుల్లో భారతీయ ఖాతాదారులకు సంబంధించిన నిధులు 2025లో గణనీయంగా తగ్గాయి. అంతకుముందు ఏడాదితో పోలిస్తే సుమారు 8 శాతం క్షీణించి 3.25 బిలియన్ స్విస్ ఫ్రాంకులకు (సుమారు రూ.36,793 కోట్లు) చేరాయి. స్విట్జర్లాండ్ కేంద్ర బ్యాంక్ అయిన స్విస్ నేషనల్ బ్యాంక్ (ఎస్ఎన్‌బీ) విడుదల చేసిన వార్షిక గణాంకాలు ఈ విషయాన్ని వెల్లడించాయి. 2024లో అనూహ్యంగా పెరిగిన నిధులు, 2025లో తిరిగి తగ్గడం గమనార్హం.

ఈ తగ్గుదలకు ప్రధాన కారణం ఇతర బ్యాంకులు, ఆర్థిక సంస్థల ద్వారా జమ చేసిన నిధులు తగ్గడమేనని నివేదిక స్పష్టం చేసింది. అయితే, దీనికి పూర్తి భిన్నంగా వ్యక్తులు, సంస్థలకు చెందిన కస్టమర్ ఖాతాల్లోని డిపాజిట్లు మాత్రం ఏకంగా 50 శాతానికి పైగా పెరగడం ఆసక్తికరంగా మారింది.

గణాంకాల విశ్లేషణ
ఎస్ఎన్‌బీ నివేదిక ప్రకారం 2025 చివరి నాటికి స్విస్ బ్యాంకులలో ఉన్న భారతీయ ఖాతాదారుల మొత్తం 3,250.5 మిలియన్ స్విస్ ఫ్రాంకులుగా న‌మోదయింది. 2024లో ఈ నిధులు మూడు రెట్లు పెరిగి 3.5 బిలియన్ ఫ్రాంకులకు చేరాయి. ఇది 2021 తర్వాత అత్యధిక స్థాయి. 2021లో స్విస్ బ్యాంకుల్లో భారతీయుల సొమ్ము 14 ఏళ్ల గరిష్ఠ స్థాయికి చేరి 3.83 బిలియన్ ఫ్రాంకులుగా రికార్డయింది.

తాజా గణాంకాల ప్రకారం మొత్తం రూ.36,793 కోట్ల నిధుల్లో.. కస్టమర్ డిపాజిట్లు 524 మిలియన్ ఫ్రాంకులు (సుమారు రూ.6,000 కోట్లు), ఇతర బ్యాంకుల ద్వారా ఉన్న నిధులు 2.6 బిలియన్ ఫ్రాంకులు, ట్రస్టులు లేదా ఫిడ్యూషియరీల ద్వారా ఉన్నవి 18.6 మిలియన్ ఫ్రాంకులు, బాండ్లు, సెక్యూరిటీల రూపంలో మరో 105.7 మిలియన్ ఫ్రాంకులు ఉన్నాయి. కస్టమర్ డిపాజిట్లు గణనీయంగా పెరిగినప్పటికీ, మొత్తం నిధుల్లో వీటి వాటా కేవలం 16 శాతం మాత్రమే ఉండటం గమనార్హం.

నల్లధనంపై స్పష్టత, సమాచార మార్పిడి
స్విస్ బ్యాంకుల్లో ఉన్నదంతా భారతీయుల నల్లధనం కాదని స్విస్ అధికారులు చాలాకాలంగా స్పష్టం చేస్తున్నారు. ఎస్ఎన్‌బీ విడుదల చేసే గణాంకాలను నల్లధనానికి కొలమానంగా చూడకూడదని వారు చెబుతున్నారు. భారతీయులు, ఎన్నారైలు ఇతర దేశాల ద్వారా పరోక్షంగా దాచుకునే నిధులు ఈ లెక్కల్లోకి రావని వారు పేర్కొన్నారు.

భారత్, స్విట్జర్లాండ్ మధ్య 2018 నుంచి ఆటోమేటిక్ సమాచార మార్పిడి ఒప్పందం అమల్లో ఉంది. దీని ప్రకారం, స్విస్ బ్యాంకుల్లో ఖాతాలు ఉన్న భారతీయ పౌరుల ఆర్థిక సమాచారాన్ని స్విస్ ప్రభుత్వం ప్రతి ఏటా భారత పన్ను అధికారులకు అందిస్తోంది. ఈ ప్రక్రియ 2019 సెప్టెంబర్‌లో మొదటిసారి ప్రారంభమై, అప్పటి నుంచి నిరంతరాయంగా కొనసాగుతోంది. అనుమానిత ఆర్థిక మోసాలకు సంబంధించి భారత అధికారులు ప్రాథమిక ఆధారాలు సమర్పించిన వందలాది కేసుల్లో స్విస్ ప్రభుత్వం ఇప్పటికే వివరాలను పంచుకుంది.

భిన్నమైన బీఐఎస్‌ డేటా.. భారత్ ర్యాంకింగ్ మెరుగు
అయితే, బ్యాంక్ ఫర్ ఇంటర్నేషనల్ సెటిల్‌మెంట్స్ (బీఐఎస్‌) విడుదల చేసే డేటా దీనికి భిన్నమైన చిత్రాన్ని చూపుతోంది. భారతీయ వ్యక్తుల డిపాజిట్లను అంచనా వేయడానికి ఇదే మెరుగైన పద్ధతి అని అధికారులు భావిస్తారు. బీఐఎస్‌ లెక్కల ప్రకారం 2025లో స్విస్ బ్యాంకుల్లోని భారతీయ వ్యక్తిగత డిపాజిట్లు 20శాతం పెరిగి 89.73 మిలియన్ డాలర్లకు (సుమారు రూ.780 కోట్లు) చేరాయి.

మరోవైపు, స్విస్ బ్యాంకుల్లో విదేశీ ఖాతాదారుల మొత్తం నిధులు 2025లో 8 శాతం తగ్గి 1.05 ట్రిలియన్ ఫ్రాంకులకు చేరాయి. ఈ జాబితాలో యూకే (192 బిలియన్ ఫ్రాంకులు), అమెరికా (75 బిలియన్ ఫ్రాంకులు) అగ్రస్థానాల్లో ఉన్నాయి. స్విస్ బ్యాంకుల్లో నిధులు కలిగిన దేశాల జాబితాలో భారత్ తన ర్యాంకును 48 నుంచి 46కు మెరుగుపరుచుకుంది. పొరుగు దేశాలైన పాకిస్థాన్ నిధులు స్వల్పంగా తగ్గగా, బంగ్లాదేశ్ నిధులు మాత్రం 43 శాతం పెరగడం గమనార్హం.