మోదీ ఫ్రాన్స్ పర్యటనకు అరుదైన ముగింపు.. ప్ర‌ధానికి హిందీలో మాక్రాన్ వీడ్కోలు సందేశం

ప్రధాని నరేంద్ర మోదీ ఫ్రాన్స్ పర్యటనకు ఒక ప్రత్యేకమైన, చారిత్రాత్మక ముగింపు లభించింది. దౌత్య సంప్రదాయాలకు భిన్నంగా, ఫ్రాన్స్ అధ్యక్షుడు ఇమ్మాన్యుయేల్ మాక్రాన్ స్వయంగా హిందీలో మాట్లాడి ప్రధాని మోదీకి వీడ్కోలు పలికారు. ఈ అసాధారణ పరిణామం ఇరు దేశాల మధ్య పెరుగుతున్న వ్యక్తిగత స్నేహానికి, వ్యూహాత్మక బంధానికి అద్దం పట్టింది.

జీ7 సదస్సు ముగింపు సందర్భంగా రికార్డ్ చేసిన ఒక ప్రత్యేక వీడియో సందేశంలో మాక్రాన్, ప్రధాని మోదీని ఉద్దేశించి.. "ప్రియ మిత్ర నరేంద్ర, ముఝే బహుత్ ఖుషీ హై, దౌరే కే లియే స్వాగత్ కర్తే, ఫ్రాన్స్ భారత్ కీ దోస్తీ అమర్ రహే" అని అన్నారు. (ప్రియ మిత్రమా నరేంద్ర, మీ పర్యటనకు స్వాగతం పలకడం చాలా సంతోషంగా ఉంది, ఫ్రాన్స్-భారత్ స్నేహం చిరస్థాయిగా వర్ధిల్లాలి) అని దీని అర్థం. హిందీలో మాట్లాడిన అనంతరం మాక్రాన్.. 'నేను సరిగ్గానే పలికానని ఆశిస్తున్నా' అని నవ్వుతూ వ్యాఖ్యానించారు. అనంతరం ఆంగ్లంలో మాట్లాడుతూ, "ప్రియ మిత్ర నరేంద్ర మోదీ, మీ పర్యటనకు ధన్యవాదాలు. ఇది చాలా ఫలవంతమైన పర్యటన. ఫ్రాన్స్ మిమ్మల్ని ప్రేమిస్తోంది. ఫిబ్రవరిలో మిమ్మల్ని మళ్లీ చూడాలని ఎదురుచూస్తున్నాము. జై హింద్" అని పేర్కొన్నారు.

ఈ స్నేహపూర్వక వీడ్కోలు వెనుక ఇరు దేశాల మధ్య బలపడుతున్న వ్యూహాత్మక భాగస్వామ్యం ఉంది. జూన్ 14న ఫ్రాన్స్‌లోని నైస్ నగరంలోని విల్లా కెరిలోస్‌లో మోదీ, మాక్రాన్ మధ్య విస్తృత స్థాయి ద్వైపాక్షిక చర్చలు జరిగాయి. ఈ ఏడాది ప్రారంభంలో భారత్-ఫ్రాన్స్ సంబంధాలను 'స్పెషల్ గ్లోబల్ స్ట్రాటజిక్ పార్టనర్‌షిప్' స్థాయికి పెంచిన తర్వాత ఇరువురు నేతలు భేటీ కావడం ఇదే ప్రథమం.

ఈ సమావేశంలో ఇరు దేశాల మధ్య రక్షణ రంగంలో సహకారంపై నేతలు సంతృప్తి వ్యక్తం చేశారు. రక్షణ పరికరాల కో-డిజైన్, కో-డెవలప్‌మెంట్, కో-ప్రొడక్షన్‌పై దృష్టి సారించి సహకారాన్ని మరింత తీవ్రతరం చేయాలని అంగీకరించారు. అదేవిధంగా, అంతరిక్ష రంగంలో సుదీర్ఘకాలంగా ఉన్న సహకారాన్ని గుర్తుచేసుకుంటూ, హ్యూమన్ స్పేస్‌ఫ్లైట్, స్పేస్ సిట్యుయేషనల్ అవేర్‌నెస్ వంటి భవిష్యత్ ప్రణాళికలపై చర్చించారు. అంతరిక్ష రంగంలో ప్రైవేట్ సంస్థల భాగస్వామ్యాన్ని ప్రోత్సహించాలని కూడా నిర్ణయించారు. దీనికి ముందు ఇరువురు నేతలు 'వివాటెక్ 2026' కార్యక్రమంలో పాల్గొని, వివిధ రంగాల్లోని స్టార్టప్‌లతో సమావేశమై అత్యాధునిక ఆవిష్కరణలను పరిశీలించారు.

జీ7 సదస్సులో భాగంగా ప్రధాని మోదీ అమెరికా అధ్యక్షుడు డొనాల్డ్ ట్రంప్‌ సహా పలువురు ప్రపంచ నేతలతో ద్వైపాక్షిక సమావేశాలు నిర్వహించారు. అయితే, మాక్రాన్ హిందీలో వీడ్కోలు పలకడం ఈ పర్యటనకే ప్రధాన ఆకర్షణగా నిలిచింది. ఇది కేవలం దౌత్యపరమైన మర్యాదే కాకుండా రెండు దేశాల మధ్య వేగంగా బలపడుతున్న నమ్మకానికి, స్నేహానికి నిదర్శనంగా విశ్లేషకులు భావిస్తున్నారు.