ఐవీఎఫ్ లో పిండాలు తారుమారు.. మా జీవితాలు నాశనమయ్యాయి: గురుగ్రామ్ దంపతుల ఆవేదన

గురుగ్రామ్‌కు చెందిన ఓ జంట జీవితంలో ఐవీఎఫ్ (ఇన్-విట్రో ఫెర్టిలైజేషన్) చికిత్స తీరని విషాదాన్ని మిగిల్చింది. ఆసుపత్రి నిర్లక్ష్యం కారణంగా పిండాలు తారుమారు కావడంతో, తమకు పుట్టిన కవలలు తమకు సంబంధించిన వారు కాదని తెలిసి ఆ కుటుంబం తీవ్ర దిగ్భ్రాంతికి గురైంది. తమ అసలు పిల్లలు ఎక్కడ ఉన్నారో తెలియక, న్యాయం కోసం మూడు నెలలుగా అధికారుల చుట్టూ తిరుగుతున్నామని వారు కన్నీటిపర్యంతమయ్యారు.

వివరాల్లోకి వెళితే, గురుగ్రామ్‌కు చెందిన రాహుల్ రాథోడ్, మీను రాథోడ్ దంపతులు గతేడాది ఓ ప్రముఖ ఐవీఎఫ్ ఆసుపత్రిలో చికిత్స తీసుకున్నారు. అన్ని ప్రక్రియలు ముగిశాక, 2025 మే 14న వారి పిండాలను మీను గర్భంలోకి ప్రవేశపెట్టారు. ఈ ఏడాది జనవరిలో ఆమె ఇద్దరు ఆడపిల్లలకు జన్మనిచ్చారు. అయితే, పుట్టిన పిల్లల పోలికలు తమకు ఏమాత్రం కలవకపోవడంతో దంపతులకు అనుమానం వచ్చింది. పిల్లల్లో ఒకరికి ఈశాన్య రాష్ట్రాల వారి పోలికలు కనిపించాయి.

దీంతో వారు పిల్లలకు డీఎన్ఏ పరీక్ష చేయించగా, ఆ ఫలితాలు చూసి నిర్ఘాంతపోయారు. ఆ కవలలు తమకు జన్మించలేదని, డీఎన్ఏ సరిపోలడం లేదని రిపోర్టులో తేలింది. ఈ షాక్‌తో తన భార్య తీవ్ర మనోవేదనకు గురై జ్ఞాపకశక్తి కూడా కోల్పోతోందని రాహుల్ ఆవేదన వ్యక్తం చేశారు. "మా వృద్ధ తల్లిదండ్రులు తీవ్రంగా కుంగిపోయారు. మా నాన్న ఈ అవమానంతో మౌనంగా ఉండిపోయారు. మా కుటుంబం మొత్తం మానసికంగా ఛిద్రమైంది" అని రాహుల్ తెలిపారు.

మూడు నెలలుగా పోలీసులకు, అధికారులకు ఫిర్యాదు చేసినా ఎవరూ పట్టించుకోలేదని, చివరకు కోర్టు జోక్యం చేసుకున్న తర్వాతే ఇటీవల ఎఫ్ఐఆర్ నమోదైందని వారు వాపోయారు. ఐవీఎఫ్ ల్యాబ్ రికార్డులు, సీసీటీవీ ఫుటేజీని పరిశీలించి, ఏ దశలో పిండాలు తారుమారు అయ్యాయో తేల్చాలని వారు డిమాండ్ చేస్తున్నారు. ఈ ఘటన దేశంలో ఫెర్టిలిటీ చికిత్సల పర్యవేక్షణ, భద్రతా ప్రమాణాలపై తీవ్ర ఆందోళనలను రేకెత్తిస్తోంది.