టీ20 ప్రపంచకప్: రాణించిన మంధాన, రిచా, హర్మన్‌ప్రీత్.. .పాక్‌కు 171 పరుగుల టార్గెట్

ఐసీసీ మహిళల టీ20 ప్రపంచకప్‌లో పాకిస్థాన్‌తో కీలక మ్యాచ్‌లో భారత జట్టు భారీ స్కోరు సాధించింది. ఓపెనర్ స్మృతి మంధాన (68) అద్భుత అర్ధశతకానికి, చివర్లో రిచా ఘోష్ (34) మెరుపులు తోడవడంతో టీమిండియా నిర్ణీత 20 ఓవర్లలో 6 వికెట్ల నష్టానికి 170 పరుగులు చేసింది. దీంతో పాకిస్థాన్ ముందు 171 పరుగుల లక్ష్యాన్ని నిర్దేశించింది.

ఇంగ్లండ్ లోని ఎడ్జ్‌బాస్టన్ వేదికగా జరుగుతున్న ఈ మ్యాచ్‌లో టాస్ గెలిచిన భారత కెప్టెన్ హర్మన్‌ప్రీత్ కౌర్ బ్యాటింగ్ ఎంచుకుంది. అయితే, ఆరంభంలోనే భారత్‌కు షాక్ తగిలింది. ఓపెనర్ షఫాలీ వర్మ (6), జెమీమా రోడ్రిగ్స్ (1) తక్కువ స్కోరుకే పెవిలియన్ చేరడంతో భారత్ 18 పరుగులకే 2 వికెట్లు కోల్పోయి కష్టాల్లో పడింది. ఈ దశలో కెప్టెన్ హర్మన్‌ప్రీత్ కౌర్ (36)తో కలిసి స్మృతి మంధాన ఇన్నింగ్స్‌ను చక్కదిద్దింది. వీరిద్దరూ మూడో వికెట్‌కు 91 పరుగుల కీలక భాగస్వామ్యం నెలకొల్పారు.

కేవలం 44 బంతుల్లో 9 ఫోర్లు, 2 సిక్సర్లతో 68 పరుగులు చేసిన మంధాన జట్టు స్కోరును పటిష్ట స్థితికి చేర్చింది. ఆమె ఔటయ్యాక, హర్మన్‌ప్రీత్ కూడా వెనుదిరిగింది. ఆ తర్వాత క్రీజులోకి వచ్చిన వికెట్ కీపర్ రిచా ఘోష్ ఆకాశమే హద్దుగా చెలరేగింది. కేవలం 17 బంతుల్లో 5 ఫోర్లు, ఒక సిక్సర్‌తో 34 పరుగులు చేసి స్కోరు బోర్డును పరుగులు పెట్టించింది. పాకిస్థాన్ బౌలర్లలో ఫాతిమా సనా, సాదియా ఇక్బాల్ చెరో రెండు వికెట్లు పడగొట్టారు.