లిఫ్టులో ముద్దు ఎంత పనిచేసింది!.. కుప్పకూలిన బిలియనీర్ కంపెనీ!

ఆర్టిఫిషియల్ ఇంటెలిజెన్స్ (ఏఐ) చిప్ దిగ్గజం 'ఎన్విడియా'కు కీలక సరఫరాదారుగా ఉన్న ఓ చైనా కంపెనీ చైర్మన్ వ్యక్తిగత జీవితం ఆ సంస్థ మార్కెట్ విలువను తీవ్రంగా ప్రభావితం చేసింది. వివాహితుడైన ఆ కంపెనీ చైర్మన్, ఒక మహిళను లిఫ్టులో ముద్దుపెట్టుకుంటున్నట్లుగా ఉన్న వీడియో ఒకటి సామాజిక మాధ్యమాల్లో వైరల్‌గా మారింది. ఈ పరిణామంతో సదరు కంపెనీ షేర్లు ఒక్కసారిగా కుప్పకూలాయి. ఈ ఘటన కారణంగా కేవలం కొన్ని గంటల వ్యవధిలోనే సంస్థ మార్కెట్ విలువ సుమారు 2.9 బిలియన్ డాలర్లు (దాదాపు 20 బిలియన్ యువాన్లు) ఆవిరైంది.

వివరాల్లోకి వెళితే, విక్టరీ జెయింట్ టెక్నాలజీ వ్యవస్థాపకుడు, 54 ఏళ్ల చెన్ టావోకు సంబంధించిన ఈ వీడియో జూన్ 6న చైనా సోషల్ మీడియా ప్లాట్‌ఫామ్ డౌయిన్‌లో ప్రత్యక్షమైంది. ఈ వీడియో వేగంగా వ్యాపించడంతో కంపెనీ భవిష్యత్తుపై ఆందోళన చెందిన మదుపర్లు షేర్లను విక్రయించడానికి మొగ్గు చూపారు. దీనివల్ల జూన్ 8న ఇంట్రాడేలో కంపెనీ షేర్ విలువ 9 శాతానికి పైగా పతనమైంది. విక్టరీ జెయింట్ టెక్నాలజీ సంస్థ ఏఐ సర్వర్లకు అవసరమైన ప్రింటెడ్ సర్క్యూట్ బోర్డుల (పీసీబీ) తయారీలో అగ్రగామిగా కొనసాగుతుంది.

ఈ పరిణామంపై కంపెనీ తక్షణమే స్పందించింది. ఆన్‌లైన్‌లో ప్రచారంలో ఉన్న ఆరోపణలకు, కంపెనీ కార్యకలాపాలకు ఎలాంటి సంబంధం లేదని స్పష్టం చేసింది. ఉత్పత్తి, ఆర్డర్లు యథాతథంగా కొనసాగుతున్నాయని, కార్పొరేట్ పాలనలో ఎటువంటి ఇబ్బందులు లేవని ఒక ప్రకటనలో వెల్లడించింది. కంపెనీ వివరణ అనంతరం, జూన్ 9 నుంచి షేర్లు తిరిగి పుంజుకున్నాయి. ప్రస్తుతం కంపెనీ మార్కెట్ విలువ సుమారు 321 బిలియన్ యువాన్ల వద్ద స్థిరంగా కొనసాగుతోంది.