మారుతి చిన్న కార్లపై ప్రైస్ ప్రొటెక్షన్... ధరల పెంపు నుంచి కస్టమర్లకు ఊరట!

దేశంలోనే అతిపెద్ద కార్ల తయారీ సంస్థ మారుతి సుజుకి ఇండియా, ఎంట్రీ-లెవల్ చిన్న కార్ల కొనుగోలుదారులకు తీపికబురు అందించింది. త్వరలో పెరగనున్న ధరల నుంచి వినియోగదారులకు రక్షణ కల్పించే ఉద్దేశంతో 'ప్రైస్ ప్రొటెక్షన్ స్కీమ్'ను ప్రకటించింది. ఈ పథకం కింద జూన్ 14 వరకు బుకింగ్ చేసుకున్న వారికి పాత ధరలే వర్తించనున్నాయి.

ఆల్టో కె10, ఎస్-ప్రెసో, సెలెరియో, వ్యాగనార్ వంటి మోడళ్లపై ఈ పథకం అందుబాటులో ఉంటుంది. జూన్ 14వ తేదీలోగా ఈ కార్లను బుక్ చేసుకున్న కస్టమర్లు, డెలివరీ ఎప్పుడు జరిగినప్పటికీ బుకింగ్ నాటి ధరకే వాహనాన్ని పొందవచ్చని కంపెనీ స్పష్టం చేసింది.

పెరుగుతున్న ముడిసరుకుల వ్యయం, ద్రవ్యోల్బణం కారణంగా తమ వాహనాలపై రూ. 30,000 వరకు ధరలను పెంచుతున్నట్లు మే నెలలోనే మారుతి సుజుకి ప్రకటించిన సంగతి తెలిసిందే. ఈ పెంపు జూన్ నెల నుంచి అమల్లోకి రానుంది. ఈ నేపథ్యంలో చిన్న కార్ల కొనుగోలుదారులకు వెసులుబాటు కల్పించేందుకే ఈ నిర్ణయం తీసుకున్నట్లు కంపెనీ సీనియర్ ఎగ్జిక్యూటివ్ పార్థో బెనర్జీ తెలిపారు. "చిన్న కార్ల కొనుగోలుదారుల కోసం ప్రైస్ ప్రొటెక్షన్ స్కీమ్‌ను ప్రవేశపెట్టాం. జూన్ 14 లోపు బుక్ చేసుకుంటే, డెలివరీ సమయంలో కూడా బుకింగ్ నాటి ధరలే వర్తిస్తాయి" అని ఆయన వివరించారు.

తొలిసారి కారు కొనుగోలు చేసేవారు, బడ్జెట్ వినియోగదారుల్లో ఈ ఎంట్రీ-లెవల్ మోడళ్లకు ఆదరణ మెండుగా ఉంటుంది. వారికి ప్రయోజనం చేకూర్చేందుకే ఈ తాత్కాలిక పథకాన్ని తీసుకువచ్చినట్లు తెలుస్తోంది. ప్రస్తుతం భారత ప్యాసింజర్ వాహన మార్కెట్లో మారుతి సుజుకి అగ్రగామిగా ఉండగా, కంపెనీ అమ్మకాల్లో చిన్న కార్ల విభాగం కీలక పాత్ర పోషిస్తోంది.