ఇది మా ఇల్లు.. ఆర్సీబీపై విరాట్ కోహ్లీ భావోద్వేగ‌ పోస్ట్

ఐపీఎల్ 2026లో రాయల్ ఛాలెంజర్స్ బెంగళూరు (ఆర్సీబీ) తమ ఆధిపత్యాన్ని మరోసారి నిరూపించుకుంది. వరుసగా రెండోసారి టైటిల్ గెలుచుకుని చరిత్ర సృష్టించింది. మే 31న అహ్మదాబాద్‌లోని నరేంద్ర మోదీ స్టేడియంలో జరిగిన ఉత్కంఠభరితమైన ఫైనల్‌లో గుజరాత్ టైటాన్స్‌ను 5 వికెట్ల తేడాతో ఓడించి ఛాంపియన్‌గా నిలిచింది. ఈ విజయంతో ఐపీఎల్ చరిత్రలో వరుసగా రెండు టైటిళ్లు గెలిచిన మూడో జట్టుగా ఆర్సీబీ రికార్డులకెక్కింది.

ఈ చారిత్రక విజయం తర్వాత జట్టు స్టార్ బ్యాటర్, కింగ్ విరాట్ కోహ్లీ సోషల్ మీడియాలో ఒక భావోద్వేగ సందేశాన్ని పంచుకున్నాడు. జట్టు ప్రయాణాన్ని, ఎదుర్కొన్న సవాళ్లను గుర్తుచేసుకుంటూ తన ఆనందాన్ని అభిమానులతో పంచుకున్నాడు. "నమ్మకంతో ఈ సీజన్‌ను ప్రారంభించాం. వరుస టైటిళ్లతో ముగించాం. ఈ జట్టు అన్ని భావోద్వేగాలను కలిసే ఎదుర్కొంది. ఎత్తుపల్లాలు, ఒత్తిడి, అడ్డంకులు అన్నింటినీ దాటాం. మాకు అండగా నిలిచిన అభిమానుల మద్దతు మరువలేనిది. ఈ ప్రదేశం మా సొంత ఇల్లులాంటిది కాబట్టి ఈ గెలుపు మరింత ప్రత్యేకం" అని కోహ్లీ తన ఎక్స్ (ట్విట్ట‌ర్‌) ఖాతాలో పేర్కొన్నాడు.

రజత్ పాటిదార్ కెప్టెన్సీలోని ఆర్సీబీ ఫైనల్‌లో పూర్తి ఆధిపత్యం ప్రదర్శించింది. లక్ష్య ఛేదనలో విరాట్ కోహ్లీ ఆకాశమే హద్దుగా చెలరేగాడు. కేవలం 42 బంతుల్లో 9 ఫోర్లు, 3 సిక్సర్లతో అజేయంగా 75 పరుగులు చేసి జట్టును విజయతీరాలకు చేర్చాడు. గుజరాత్ బౌలర్లు చివర్లో వికెట్లు తీసి ఒత్తిడి పెంచినా కోహ్లీ తన అపార అనుభవాన్ని ఉపయోగించి మరో రెండు ఓవర్లు మిగిలి ఉండగానే జట్టుకు విజయాన్ని అందించాడు.

ఈ సీజన్ మొత్తం విరాట్ కోహ్లీ అద్భుతమైన ఫామ్‌ను కొనసాగించాడు. మొత్తం 675 పరుగులు సాధించి, తనదైన ముద్ర వేశాడు. అతని స్ట్రైక్ రేట్ 165.54గా ఉండటం విశేషం. ఇందులో ఒక సెంచరీ, ఐదు హాఫ్ సెంచరీలు ఉన్నాయి. ఆర్సీబీతో 19 ఏళ్ల సుదీర్ఘ ప్రయాణంలో, వరుసగా రెండు టైటిళ్లను గెలవడం కోహ్లీకి, జట్టు అభిమానులకు చిరస్మరణీయంగా నిలిచిపోతుంది.