అండమాన్‌లో మళ్లీ గ్యాస్ సిరులు.. రెండో భారీ నిక్షేపాన్ని కనుగొన్న ఆయిల్ ఇండియా.. ఇదిగో వీడియో!

భారత ఇంధన రంగంలో మరో కీలక పరిణామం చోటుచేసుకుంది. ప్రభుత్వ రంగ సంస్థ ఆయిల్ ఇండియా లిమిటెడ్ (ఓఐఎల్‌) అండమాన్ సముద్ర తీరంలో మరోసారి సహజ వాయువు నిక్షేపాలను కనుగొంది. ఇది ఈ ప్రాంతంలో కంపెనీకి రెండో అతిపెద్ద విజయం. ఈ పరిణామంతో రాబోయే సంవత్సరాల్లో అండమాన్ బేసిన్ దేశంలోని కీలక హైడ్రోకార్బన్ ఉత్పత్తి ప్రాంతంగా మారే అవకాశాలున్నాయని అంచనాలు బలపడ్డాయి.

విజయాపురం-3లో గ్యాస్ వెల్లువ..  
కేంద్ర పెట్రోలియం, సహజ వాయువుల శాఖ మంత్రి హర్దీప్ సింగ్ పూరి ఈ విషయాన్ని శుక్రవారం ప్రకటించారు. అండమాన్ దీవుల తూర్పు తీరానికి సుమారు 15 కిలోమీటర్ల దూరంలో, 355 మీటర్ల నీటి లోతులో ఉన్న విజయాపురం-3 అనే అన్వేషణ బావిలో ఈ గ్యాస్ నిక్షేపాలను గుర్తించినట్లు ఆయన తెలిపారు. 

ఈ బ్లాక్‌లో ఆయిల్ ఇండియా డ్రిల్ చేసిన బావుల్లో గ్యాస్ లభించడం ఇది రెండోసారి. ఇంతకుముందు 2025 సెప్టెంబర్‌లో విజయాపురం-2 బావిలో తొలిసారిగా సహజ వాయువును కనుగొన్నారు. ఇప్పటివరకు అండమాన్‌లో ఆయిల్ ఇండియా చేపట్టిన అన్వేషణ కార్యక్రమంలో భాగంగా మూడు బావులను డ్రిల్ చేయగా, వాటిలో రెండు చోట్ల హైడ్రోకార్బన్ల ఉనికి నిర్ధారణ అయింది. ఇది అండమాన్ బేసిన్‌లో భవిష్యత్ అన్వేషణలకు మంచి సంకేతమని కంపెనీ వర్గాలు పేర్కొన్నాయి.

ఈ ఆవిష్కరణపై మంత్రి హర్దీప్ సింగ్ పూరి తన 'ఎక్స్' ఖాతాలో స్పందించారు. "దేశీయ ఇంధన భద్రతను బలోపేతం చేసే ప్రయత్నాల్లో ఇది మరో సానుకూల పరిణామం. ఇయోసిన్ ఫార్మేషన్‌లో 1900 మీటర్లకు పైగా లోతులో జరిపిన ప్రాథమిక ఉత్పత్తి పరీక్షల్లో సహజ వాయువు ఉనికి నిర్ధారణ అయింది" అని ఆయన పేర్కొన్నారు. 

"2025 స్వాతంత్ర్య దినోత్సవం రోజున ప్రధాని మోదీ ప్రకటించిన 'సముద్ర మంథన్ మిషన్' (నేషనల్ డీప్ వాటర్ ఎక్స్‌ప్లోరేషన్ మిషన్) కింద, మన సముద్ర బేసిన్‌లలోని హైడ్రోకార్బన్ నిల్వలను పూర్తిగా వెలికితీసేందుకు పెద్ద సంఖ్యలో డీప్‌వాటర్, అల్ట్రా డీప్‌వాటర్ అన్వేషణ బావులను తవ్వాలని యోచిస్తున్నాం" అని మంత్రి తన పోస్ట్‌లో వివరించారు. ఈ గ్యాస్ లభ్యత, అంతర్జాతీయ డీప్‌వాటర్ నిపుణుల సహకారంతో దేశ అన్వేషణ లక్ష్యాలను ముందుకు తీసుకెళ్లడంలో సహాయపడుతుందని ఆయన అన్నారు.

కంపెనీ అందించిన వివరాల ప్రకారం 1,900 మీటర్లకు పైగా లోతులో నిర్వహించిన ప్రాథమిక పరీక్షల్లో, నిరంతరాయంగా మంటను మండించడం ద్వారా గ్యాస్ ఉనికిని నిర్ధారించారు. విజయాపురం-2లో గ్యాస్ కనుగొన్న తర్వాత ఆయిల్ ఇండియా విస్తృతమైన అంచనా కార్యక్రమాన్ని ప్రారంభించింది. ఇందులో భాగంగా పాత సీస్మిక్ డేటాను రీప్రాసెస్ చేయడంతో పాటు దాదాపు 600 చదరపు కిలోమీటర్ల మేర అదనపు 3డీ సీస్మిక్ డేటాను సేకరించింది. ఈ డేటా విశ్లేషణ ప్రస్తుతం కొనసాగుతోందని, దాని ఆధారంగా భవిష్యత్ డ్రిల్లింగ్ కార్యకలాపాలను ప్లాన్ చేస్తామని కంపెనీ తెలిపింది.

వరుసగా రెండుసార్లు గ్యాస్ నిక్షేపాలు బయటపడటంతో ఇంతకాలం పెద్దగా అన్వేషణ జరగని అండమాన్ బేసిన్ ఇప్పుడు దేశంలోని అత్యంత ఆశాజనకమైన ప్రాంతాల్లో ఒకటిగా నిలుస్తోంది. ఈ ఆవిష్కరణలు ఈ ప్రాంతంలో మరిన్ని హైడ్రోకార్బన్ నిక్షేపాలు ఉండే అవకాశం ఉందని సూచిస్తున్నాయని పరిశ్రమ నిపుణులు భావిస్తున్నారు. మంత్రి పూరి పోస్ట్‌కు స్పందిస్తూ.. "సాంకేతిక నైపుణ్యంతో అన్వేషణను ముందుకు తీసుకెళ్లడానికి, సురక్షితమైన ఇంధన భవిష్యత్తు కోసం దేశ హైడ్రోకార్బన్ సామర్థ్యాన్ని వెలికితీయడానికి ఆయిల్ ఇండియా కట్టుబడి ఉంది" అని కంపెనీ పేర్కొంది.