మానవత్వం ఇంకా బతికే ఉంది.. నెట్టింట వైరల్ అవుతున్న ఆటో డ్రైవర్ నిజాయతీ

సాధారణంగా జరిగే ఓ ఆటో ప్రయాణం, ఓ గొప్ప నిజాయతీ కథకు వేదికైంది. పొరపాటున తన బ్యాంకు ఖాతాలోకి వచ్చిన రూ.15,682ను ఓ ఆటో డ్రైవర్ తిరిగి ప్రయాణికుడికి ఇచ్చేసి తన గొప్ప మనసును చాటుకున్నాడు. ప్రయాణికుడు ఈ విషయాన్ని లింక్డ్‌ఇన్‌లో పంచుకోవడంతో ఆటో డ్రైవర్ నిజాయితీకి నెటిజన్ల నుంచి ప్రశంసల వర్షం కురుస్తోంది.

వివరాల్లోకి వెళితే, ఓ వ్యక్తి ఆటోలో ప్రయాణించి, గమ్యం చేరాక డిజిటల్ పద్ధతిలో ఛార్జీ చెల్లించాడు. అయితే, ఆ సమయంలో పొరపాటున రూ.15,682ను డ్రైవర్ ఖాతాకు బదిలీ చేశాడు. లావాదేవీ పూర్తయ్యాక గానీ తన తప్పును గుర్తించలేకపోయాడు. అంత పెద్ద మొత్తం తిరిగి వస్తుందో రాదోనని ఆందోళన చెందుతూ డ్రైవర్‌ను సంప్రదించే ప్రయత్నం చేశాడు.

అయితే, ప్రయాణికుడి ఆశ్చర్యానికి గురిచేస్తూ, ఆటో డ్రైవర్ వెంటనే ఒక్క రూపాయి కూడా తీసుకోకుండా మొత్తం రూ.15,682ను తిరిగి ప్రయాణికుడి ఖాతాకు పంపించేశాడు. డ్రైవర్ నిజాయతీకి ముగ్ధుడైన ఆ ప్రయాణికుడు, ఈ అనుభవాన్ని లింక్డ్‌ఇన్‌లో పంచుకున్నారు. "ఆటో డ్రైవర్ నిజాయతీకి ఇది నిదర్శనం" అంటూ పోస్ట్ పెట్టడంతో అది క్షణాల్లో వైరల్ అయింది.

ఈ కథ సోషల్ మీడియాలో వేలాది మందిని ఆకట్టుకుంది. "మానవత్వంపై నమ్మకాన్ని ఈ ఘటన రెట్టింపు చేసింది" అంటూ పలువురు కామెంట్లు చేశారు. డిజిటల్ చెల్లింపులలో పొరపాట్లు సర్వసాధారణమైనప్పటికీ, ఇలాంటి నిజాయతీ సంఘటనలు చాలా అరుదుగా వెలుగులోకి వస్తాయని, ఆ డ్రైవర్ ఎందరికో ఆదర్శంగా నిలిచారని నెటిజన్లు ప్రశంసిస్తున్నారు.