ట్రంప్ ఒక శాంతి కాముకుడు: పాక్ ప్రధాని షెహబాజ్ షరీఫ్ ప్రశంసలు

అమెరికా అధ్యక్షుడు డొనాల్డ్ ట్రంప్‌ను పాకిస్థాన్ ప్రధాని షెహబాజ్ షరీఫ్ 'శాంతి కాముకుడు'గా అభివర్ణించారు. గత ఏడాది మే నెలలో భారత్, పాకిస్థాన్ మధ్య కాల్పుల విరమణ ఒప్పందం కుదరడంలో ట్రంప్ కీలక పాత్ర పోషించారని, ఆయన చొరవ వల్లే దక్షిణాసియాలో శాంతి నెలకొందని షరీఫ్ పేర్కొన్నారు.

శుక్రవారం విడుదల చేసిన ఒక ప్రకటనలో షరీఫ్ ఈ వ్యాఖ్యలు చేశారు. "గత ఏడాది పహల్గాం ఘటన అనంతరం భారత్ రెచ్చగొట్టే చర్యలకు పాల్పడినప్పుడు, అధ్యక్షుడు ట్రంప్ సమయానుకూలంగా, నిర్ణయాత్మకంగా జోక్యం చేసుకోవడం వల్లే మే 10న ఇరు దేశాల మధ్య కాల్పుల విరమణ సాధ్యమైంది. దక్షిణాసియాలో శాంతిని పునరుద్ధరించి, లక్షలాది మంది ప్రాణాలను కాపాడిన ట్రంప్‌కు మేం ఎల్లప్పుడూ కృతజ్ఞతతో ఉంటాం" అని షరీఫ్ వివరించారు. ఈ విషయంలో ట్రంప్ ఎప్పటికీ శాంతి కాముకుడిగానే గుర్తుండిపోతారని ఆయన పేర్కొన్నారు.

2025లో పహల్గాం వద్ద చోటుచేసుకున్న ఓ ఘటనతో భారత్, పాకిస్థాన్ మధ్య తీవ్ర ఉద్రిక్తతలు నెలకొన్న విషయం తెలిసిందే. దీనికి ప్రతిచర్యగా భారత సైన్యం 'ఆపరేషన్ సిందూర్' పేరిట ఉగ్రవాద స్థావరాలపై దాడులు నిర్వహించింది. ఆ సమయంలో అధిక టారిఫ్‌లు విధిస్తామని హెచ్చరించడంతో పాటు, దౌత్యపరమైన ఒత్తిడిని ఉపయోగించి తానే కాల్పుల విరమణ ఒప్పందాన్ని కుదిర్చానని ట్రంప్ అప్పట్లో బహిరంగంగా ప్రకటించారు.

షరీఫ్ చేసిన తాజా వ్యాఖ్యలు పాకిస్థాన్, అమెరికా మధ్య కొనసాగుతున్న ప్రత్యేక సంబంధాలకు అద్దం పడుతున్నాయి. అయితే, ఇలాంటి వ్యాఖ్యలను పలు సందర్భాలలో భారత్ తీవ్రంగా ఖండించిన సంగతి తెలిసిందే!