అమెరికా-ఇజ్రాయెల్ దాడి.. ఖమేనీ మృతి చెందినప్పుడు అదే ఆఫీసులో ఇరాన్ విదేశాంగ మంత్రి!

ఇరాన్ సుప్రీం లీడర్ అయతొల్లా అలీ ఖమేనీ మృతికి సంబంధించిన ఉదంతంపై ఆ దేశ విదేశాంగ మంత్రి అబ్బాస్ అరాఘ్చీ సంచలన విషయాలను వెల్లడించారు. ఫిబ్రవరి 28న అమెరికా-ఇజ్రాయెల్ సంయుక్తంగా జరిపిన దాడి సమయంలో తాను ఖమేనీ కార్యాలయంలోనే ఉన్నట్లు ఆయన పేర్కొన్నారు. ఆ భయానక క్షణాలను అరాఘ్చీ తాజాగా ఒక లెబనాన్ వార్తా సంస్థకు ఇచ్చిన ఇంటర్వ్యూలో గుర్తుచేసుకున్నారు.

జెనీవాలో కీలక దౌత్య చర్చలను ముగించుకుని వచ్చిన మరుసటి రోజు ఉదయం, ఆ వివరాలను తెలియజేసేందుకు తాను నేరుగా ఖమేనీ కార్యాలయానికి వెళ్లినట్లు అరాఘ్చీ తెలిపారు. "దాడి జరిగిన సమయంలో నేను ఆ భవనంలోనే ఉన్నాను. మేము కూర్చున్న ప్రాంతం సైతం తీవ్రంగా దెబ్బతిన్నది. శిథిలాల నుంచి బయటపడిన తర్వాత నా భద్రత కంటే కూడా ఆయన క్షేమం గురించే ఆలోచించాను. రెండు రోజుల పాటు ఖమేనీ ఆరోగ్య పరిస్థితిపై స్పష్టత లేకపోవడంతో తీవ్ర ఆందోళనకు గురయ్యాను" అని ఆయన వివరించారు.

అమెరికా, ఇజ్రాయెల్ నుంచి ముప్పు పొంచి ఉందన్న ముందస్తు హెచ్చరికలు ఉన్నప్పటికీ, సురక్షిత ప్రాంతానికి వెళ్లేందుకు ఖమేనీ నిరాకరించినట్లు అరాఘ్చీ వెల్లడించారు. "తన ప్రజలకు ఏది సంభవిస్తే, తనకూ అదే జరుగుతుందని ఆయన అనేవారు" అని పేర్కొన్నారు. ఈ దాడిలో ఖమేనీతో పాటు ఇస్లామిక్ రివల్యూషనరీ గార్డ్ కార్ప్స్ (ఐఆర్జీసీ) కు చెందిన పలువురు అగ్రశ్రేణి కమాండర్లు కూడా ప్రాణాలు కోల్పోయారు. ఖమేనీ మరణానంతరం ఆయన కుమారుడు మొజ్తబా ఖమేనీ దేశ నాయకత్వ బాధ్యతలను స్వీకరించడం తెలిసిందే.