తుమ్మెదల అద్భుత మేధస్సు.. శాస్త్రవేత్తలకే ఆశ్చర్యం!

చింపాంజీలు, డాల్ఫిన్‌ల వంటి భారీ మెదడు కలిగిన జీవులకు మాత్రమే పరిమితమని భావించే అసాధారణ మేధో సామర్థ్యం తమకూ ఉందని బంబుల్ బీలు (ఒక రకమైన తుమ్మెదలు) నిరూపించాయి. ఎటువంటి ముందస్తు శిక్షణ లేకుండానే, క్లిష్టమైన సమస్యలను స్వయంగా పరిష్కరించుకోగల సామర్థ్యం వీటికి ఉందని తాజా అధ్యయనం వెల్లడించింది. ఈ సంచలన పరిశోధన వివరాలు ప్రతిష్ఠాత్మక 'సైన్స్' జర్నల్‌లో ప్రచురితమయ్యాయి.

ఫిన్లాండ్‌లోని 'ఓలు' యూనివర్సిటీ పరిశోధకులు ఈ ప్రయోగాలను నిర్వహించారు. ఎగరడానికి వీలులేని రీతిలో రూపొందించిన ఒక ప్రయోగశాలలో, ఎత్తులో ఉన్న ఒక కృత్రిమ పుష్పం నుంచి చక్కెర ద్రావణాన్ని సేకరించేందుకు తుమ్మెదలు ప్రయత్నించాయి. ఆ క్రమంలో, అక్కడ ఉన్న ఒక చిన్న బంతిని ఆ పుష్పం కిందకు దొర్లించి, దానిపైకి ఎక్కి తమ లక్ష్యాన్ని సునాయాసంగా చేరుకున్నాయి.

ఈ క్లిష్టమైన సమస్యను పరిష్కరించేందుకు వాటికి ఎటువంటి శిక్షణ ఇవ్వకపోవడం గమనార్హం. కీటకాలలో ఇటువంటి మేధో ప్రవర్తనను గుర్తించడం ఇదే తొలిసారి అని ప్రధాన పరిశోధకుడు అక్షయ్ భంబోరే తెలిపారు. ఇది వాటిలోని వినూత్న ఆలోచనా ధోరణికి, ప్రణాళికాబద్ధమైన మేధో సామర్థ్యానికి నిదర్శనమని ఆయన పేర్కొన్నారు.

గతంలో ఆహారం కోసం చింపాంజీలు పెట్టెలను ఒకదానిపై ఒకటి పేర్చిన ప్రయోగం తరహాలోనే ఇది ఉందని నిపుణులు విశ్లేషిస్తున్నారు. అత్యంత సూక్ష్మమైన మెదడు కలిగిన కీటకాల సైతం సమస్య పరిష్కార సామర్థ్యాలను కలిగి ఉంటాయని ఈ పరిశోధన రుజువు చేస్తోంది. మారుతున్న పర్యావరణ పరిస్థితులను తట్టుకుని మనుగడ సాగించడానికి ఇటువంటి నైపుణ్యాలు వాటికి ఎంతగానో దోహదపడతాయని శాస్త్రవేత్తలు భావిస్తున్నారు.