హైదరాబాదులో 'బర్త్ డే రోడ్'... యూత్ లో భలే క్రేజ్!

హైదరాబాద్ నగరంలో యువత ఓ వింత ట్రెండ్‌కు తెరలేపింది. ఖాజాగూడ లేక్ రోడ్డులోని డివైడర్‌పై అర్థరాత్రి పూట కేక్‌లు కట్ చేస్తూ పుట్టినరోజు వేడుకలు జరుపుకుంటున్న దృశ్యాలు సోషల్ మీడియాలో వైరల్ అయ్యాయి. ఒకే సమయంలో పదుల సంఖ్యలో గ్రూపులు ఇక్కడ సంబరాలు చేసుకోవడం అందరినీ ఆశ్చర్యపరుస్తోంది.

స్థానిక కంటెంట్ క్రియేటర్ షేర్ చేసిన ఈ వీడియోలో, 10కి పైగా బృందాలు ఒకేసారి డివైడర్‌పై కేక్‌లు, బెలూన్లు, లైట్లతో సందడి చేస్తూ కనిపించాయి. వెళుతున్న ట్రాఫిక్‌ను సైతం లెక్కచేయకుండా వారు ఫోటోలు దిగుతూ వేడుకల్లో మునిగిపోయారు. ఈ వీడియో వైరల్ అవడంతో నెటిజన్లు సరదాగా ఈ ప్రాంతానికి 'బర్త్‌డే రోడ్' అని పేరు పెట్టారు. కొందరు ఇది 2022-23 నుంచే ఉన్న పాత అలవాటేనని గుర్తుచేసుకుంటున్నారు.

కేఫ్‌లు, రెస్టారెంట్లు ఖరీదైనవిగా మారడంతో, యువత, విద్యార్థులు ఇలాంటి ప్రత్యామ్నాయ మార్గాలను ఎంచుకుంటున్నారు. ఖాజాగూడ రోడ్డు విశాలంగా, ఆహ్లాదకరంగా ఉండటంతో అర్థరాత్రి వేడుకలకు ఇది అనువైన ప్రదేశంగా మారింది. నగరాల్లో యువత స్వేచ్ఛగా గడిపేందుకు సరైన పబ్లిక్ స్థలాలు అందుబాటులో లేకపోవడం కూడా ఈ ధోరణికి ఒక కారణంగా పట్టణ నిపుణులు విశ్లేషిస్తున్నారు.

ఈ వేడుకలు సరదాగా అనిపించినప్పటికీ, భద్రత, పౌర బాధ్యతపై పలు ప్రశ్నలు తలెత్తుతున్నాయి. రాత్రిపూట ట్రాఫిక్ మధ్య ఇలాంటి సంబరాలు జరుపుకోవడం ప్రమాదకరమని, ప్రమాదాలకు దారితీయవచ్చని పలువురు ఆందోళన వ్యక్తం చేస్తున్నారు. వేడుకల అనంతరం కేక్ బాక్సులు, ప్లాస్టిక్ వ్యర్థాలు అక్కడే వదిలేయడం వల్ల పరిశుభ్రత సమస్యలు కూడా వస్తున్నాయి.