కర్ణాటకలో ఘోర రోడ్డు ప్రమాదం.. ఆరుగురు కూలీల దుర్మరణం

కర్ణాటకలో ఘోర రోడ్డు ప్రమాదం సంభవించింది. చిక్కబళ్లాపూర్ జిల్లా బాగేపల్లి పట్టణం సమీపంలో ఆదివారం సాయంత్రం జరిగిన ఈ దుర్ఘటనలో ఆరుగురు వలస కూలీలు అక్కడికక్కడే ప్రాణాలు కోల్పోయారు. మరో తొమ్మిది మందికి గాయాలయ్యాయి.

వివరాల్లోకి వెళితే, పని ముగించుకుని సుమారు 15 మంది కూలీలు ఒక ఆటోలో ఇంటికి బయలుదేరారు. జాతీయ రహదారి 44పై గంగోత్రి పెట్రోల్ పంప్ వద్దకు రాగానే, వేగంగా వస్తున్న ఒక కంటైనర్ లారీ ఆటోను బలంగా ఢీకొట్టింది. ఈ ప్రమాద తీవ్రతకు ఆటో పూర్తిగా నుజ్జునుజ్జయింది. దీంతో ఆటోలో ప్రయాణిస్తున్న వారిలో ఆరుగురు అక్కడికక్కడే మృతి చెందారు.

ప్రమాదం జరిగిన వెంటనే స్థానికులు, సహాయక బృందాలు ఘటనాస్థలికి చేరుకుని సహాయక చర్యలు చేపట్టాయి. గాయపడిన వారిని వెంటనే సమీపంలోని ఆసుపత్రికి తరలించారు. సామర్థ్యానికి మించి ఆటోలో ప్రయాణించడం, లారీ అతివేగమే ప్రమాదానికి ప్రధాన కారణాలని ప్రాథమికంగా భావిస్తున్నారు.

ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు.