అందమైన నెమళ్లతో తలనొప్పి.. ఆ పట్టణ ప్రజలకు వింత కష్టం!

మన దేశంలో ఎంతో పవిత్రంగా, జాతీయ పక్షిగా గౌరవించే నెమళ్లు ఓ దేశంలో మాత్రం ప్రజలకు తీవ్ర తలనొప్పిగా మారాయి. ఇటలీలోని పుంటా మెరీనా అనే చిన్న తీరప్రాంత పట్టణంలో వందలాది నెమళ్లు సృష్టిస్తున్న గందరగోళం అక్కడి ప్రజలకు కంటిమీద కునుకు లేకుండా చేస్తోంది. రోడ్లపై గుంపులుగా తిరుగుతూ ట్రాఫిక్‌ను అడ్డుకోవడం, పార్క్ చేసిన కార్ల అద్దాలపై దాడి చేయడం, పెద్దగా అరుస్తూ శాంతి లేకుండా చేస్తుండటంతో స్థానికులు విసిగిపోతున్నారు.

కొన్ని సంవత్సరాల క్రితం ఒక పైన్ అడవిలోకి తప్పించుకువచ్చిన ఒకే ఒక్క నెమలితో ఈ సమస్య మొదలైంది. ఆ తర్వాత దానికి జతగా మరో నెమలిని తీసుకురావడంతో వాటి సంఖ్య నెమ్మదిగా పెరిగింది. అయితే, కరోనా లాక్‌డౌన్ సమయంలో ప్రజలు వాటికి రోజూ ఆహారం పెట్టడం ప్రారంభించారు. ఆ ప్రాంతంలో వాటిని వేటాడే జంతువులు కూడా లేకపోవడంతో వాటి జనాభా అనూహ్యంగా పెరిగిపోయింది. 2023లో కేవలం 30గా ఉన్న నెమళ్ల సంఖ్య, ఇప్పుడు 150కి చేరువలో ఉందని అంచనా.

ఈ నెమళ్ల విషయంలో పట్టణ ప్రజలు రెండు వర్గాలుగా విడిపోయారు. కొందరు వీటిని చూసి మురిసిపోతూ, పర్యాటక ఆకర్షణగా మారాయని చెబుతున్నారు. మరికొందరు మాత్రం వీటితో విసిగిపోయామని, వెంటనే ఇక్కడి నుంచి తరలించాలని డిమాండ్ చేస్తున్నారు. జంతు సంక్షేమ సంస్థలు మాత్రం కఠిన చర్యలను వ్యతిరేకిస్తున్నాయి. దీంతో అధికారులు ప్రజలకు ఓ విజ్ఞప్తి చేశారు. 'నెమళ్లకు ఆహారం పెట్టవద్దు' అంటూ పట్టణంలో బోర్డులు ఏర్పాటు చేశారు.

అందంగా కనిపించే పక్షులు, అధిక సంఖ్యలో ఒకేచోట చేరితే ఎలాంటి ఇబ్బందులు వస్తాయో చెప్పడానికి పుంటా మెరీనా ఓ ఉదాహరణగా నిలుస్తోంది. అమెరికాలోని కాలిఫోర్నియా, ఫ్లోరిడా వంటి ప్రాంతాల్లో కూడా గతంలో ఇలాంటి సమస్యలే తలెత్తడం గమనార్హం.