మృణాల్, పూజా హెగ్డేలకు గులాబ్ జామూన్ తినిపించిన వరుణ్ ధావన్

'హై జవానీ తో ఇష్క్ హోనా హై' సినిమా ప్రమోషన్స్ లో ఆసక్తికర దృశ్యం కనిపించింది. హీరో వరుణ్ ధావన్ తన హీరోయిన్లు మృణాల్ ఠాకూర్, పూజా హెగ్డేలకు ప్రేమగా గులాబ్ జామూన్ తినిపించారు. అహ్మదాబాద్ వెళ్లినప్పుడు ఈ సరదా సన్నివేశం చోటుచేసుకుంది. ముగ్గురూ కలిసి అక్కడి రుచికరమైన థాలీని ఆస్వాదించడానికి ముందు వరుణ్ ఇలా సందడి చేశారు.

వరుణ్, మృణాల్, పూజా హెగ్డే ప్రధాన పాత్రల్లో నటించిన ఈ రొమాంటిక్ కామెడీ చిత్రం జూన్ 5న విడుదల కానుంది. ఇటీవల విడుదలైన ఈ సినిమా ట్రైలర్ ప్రేక్షకులలో ఆసక్తిని రేకెత్తిస్తోంది. ట్రైలర్ ప్రకారం, వరుణ్, మృణాల్ భార్యాభర్తలుగా కనిపిస్తారు. అయితే, కొన్ని కారణాల వల్ల వారు విడాకుల కోసం కోర్టు మెట్లు ఎక్కుతారు. ఈ గందరగోళం మధ్యలో వరుణ్ జీవితంలోకి పూజా హెగ్డే ప్రవేశిస్తుంది. కథలోని మలుపు ఏంటంటే, తండ్రి కావాలని తపించే వరుణ్ పాత్ర.. చివరికి మృణాల్, పూజా ఇద్దరి పిల్లలకూ తండ్రి అవడం.

టిప్స్ ఫిలింస్, మాక్సిమిలియన్ ఫిలింస్ సంయుక్తంగా నిర్మించిన ఈ చిత్రంలో మౌనీ రాయ్, చుంకీ పాండే, మనీష్ పాల్, జిమ్మీ షెర్గిల్ వంటి ప్రముఖులు సహాయక పాత్రలలో నటించారు.

ఈ చిత్రం గురించి దర్శకుడు డేవిడ్ ధావన్ మాట్లాడుతూ, "ఇది నా 46వ సినిమా. ప్రేక్షకులను అలరించడమే నాకు ఆనందాన్ని ఇస్తుంది. ఈ సినిమాలో హాస్యం, గందరగోళం, సంగీతం, భావోద్వేగాలు అన్నీ ఉన్నాయి" అని తెలిపారు. డేవిడ్ ధావన్, వరుణ్ ధావన్ తండ్రీ కొడుకులు అని తెలిసిందే. వీరి కాంబినేషన్‌లో వస్తున్న నాలుగో చిత్రమిది. గతంలో వీరిద్దరూ 'మై తేరా హీరో', 'జుడ్వా 2', 'కూలీ నెం.1' చిత్రాలకు కలిసి పనిచేశారు.