ప్రొఫెసర్ నాగేశ్వర్ ను అరెస్ట్ చేసేందుకు ఏపీ పోలీసులు తెలంగాణ వెళ్లారా?... ఫ్యాక్ట్ చెక్ ఇదిగో!

ప్రముఖ రాజకీయ విశ్లేషకుడు ప్రొఫెసర్ కె. నాగేశ్వర్‌ను అరెస్ట్ చేసేందుకు ఆంధ్రప్రదేశ్ పోలీసులు తెలంగాణకు వెళ్లారంటూ సామాజిక మాధ్యమాల్లో జరుగుతున్న ప్రచారంలో వాస్తవం లేదని ఏపీ ప్రభుత్వం స్పష్టం చేసింది. ఇది పూర్తిగా నిరాధారమైనదని, కొందరు ఉద్దేశపూర్వకంగా వ్యాప్తి చేస్తున్న దుష్ప్రచారమని తేల్చిచెప్పింది. ఈ మేరకు ఏపీ ప్రభుత్వ అధికారిక ఫ్యాక్ట్ చెక్ విభాగం 'ఎక్స్' వేదికగా ఓ పోస్ట్ ద్వారా వెల్లడించింది. తెలుగుదేశం పార్టీ కూడా ఈ పోస్ట్ ను షేర్ చేసింది.

కొద్ది రోజుల క్రితం ఏపీ ఉప ముఖ్యమంత్రి పవన్ కల్యాణ్ కు సంబంధించి ఓ టీవీ చర్చా కార్యక్రమంలో ప్రొఫెసర్ నాగేశ్వర్ చేసిన వ్యాఖ్యలు తీవ్ర వివాదానికి దారితీశాయి. ఈ వ్యాఖ్యలపై జనసేన కార్యకర్తలు తీవ్ర ఆగ్రహం వ్యక్తం చేశారు. ఈ క్రమంలో కాకినాడ ప్రాంతంలోని సర్పవరం, ఇంద్రపాలెం వంటి పలు పోలీస్ స్టేషన్లలో ప్రొఫెసర్ నాగేశ్వర్‌పై వివిధ సెక్షన్ల కింద ఎఫ్ఐఆర్ లు నమోదు చేశారు.

ఆ తర్వాత ప్రొఫెసర్ నాగేశ్వర్ తన వ్యాఖ్యలను ఉపసంహరించుకున్నప్పటికీ, కేసుల నమోదు వ్యవహారం రాజకీయంగా వేడి పుట్టించింది. ఇది భావ ప్రకటనా స్వేచ్ఛపై దాడి అని వైసీపీ, బీఆర్ఎస్ సహా పలువురు నేతలు విమర్శించారు. హైదరాబాద్‌లో నాగేశ్వర్‌ను అరెస్ట్ చేయడానికి ప్రయత్నిస్తే తెలంగాణ మేధావులపై దాడిగా పరిగణిస్తామని, తీవ్రంగా ప్రతిఘటిస్తామని టీఆర్ఎస్ అధినేత్రి కవిత హెచ్చరించారు. ఈ నేపథ్యంలోనే తాజాగా అరెస్ట్ కోసం ఏపీ పోలీసులు హైదరాబాద్ వెళ్లారనే వదంతులు వ్యాపించగా, ఏపీ ప్రభుత్వం వాటిని ఖండించడంతో ఈ ఊహాగానాలకు తెరపడింది.