ఇన్‌స్టాగ్రామ్‌లో నన్ను ఎప్పటికీ అన్‌బ్లాక్ చేయరు: డేవిడ్ వార్నర్ ఆవేదన

సన్‌రైజర్స్ హైదరాబాద్ (SRH) మాజీ కెప్టెన్ డేవిడ్ వార్నర్ తనను ఆ ఫ్రాంచైజీ ఇంకా ఇన్‌స్టాగ్రామ్‌లో బ్లాక్‌లోనే ఉంచినట్లు వెల్లడించాడు. వార్నర్ తన అధికారిక ఇన్‌స్టాగ్రామ్ స్టోరీలో ఎస్ఆర్‌హెచ్ ప్రొఫైల్‌కు సంబంధించిన ఒక స్క్రీన్‌షాట్‌ను పంచుకున్నాడు. అందులో ఆ ఖాతా 'ప్రైవేట్'గా చూపిస్తోంది. సాధారణంగా ఎవరైనా బ్లాక్ చేసినప్పుడు వినియోగదారులకు ఇలాగే కనిపిస్తుంది.

అంతేకాదు, ఇది నిజంగానే అధికారిక ఎస్ఆర్‌హెచ్ ఖాతాయేనా? అని ప్రశ్నిస్తూ వార్నర్ తన ఇన్‌స్టాగ్రామ్‌లో ఒక పోల్ కూడా పెట్టాడు. ఇటీవల వార్నర్ చేసిన ఒక ఇన్‌స్టాగ్రామ్ పోస్ట్‌పై ఓ అభిమాని స్పందిస్తూ.. ఎస్ఆర్‌హెచ్ ఖాతాను ట్యాగ్ చేసి, వార్నర్‌ను అన్‌బ్లాక్ చేయాలని కోరడంతో ఈ విషయం చర్చనీయాంశమైంది. దీనిపై వార్నర్ స్పందిస్తూ.. "వాళ్లు నన్ను ఎప్పటికీ అన్‌బ్లాక్ చేయరు" అని కామెంట్ చేశాడు.

ఎస్‌ఆర్‌హెచ్, వార్నర్‌ల బంధం తెగిపోయిందిలా..
2024 సీజన్ తర్వాత డేవిడ్ వార్నర్ ఇండియన్ ప్రీమియర్ లీగ్ (IPL)లో ఆడలేదు. ఈ ఆస్ట్రేలియా ఓపెనర్ ఇటీవల పాకిస్థాన్ సూపర్ లీగ్ (PSL)లో కనిపించాడు. అలాగే ప్రపంచవ్యాప్తంగా జరిగే విభిన్న ఫ్రాంచైజీ ఆధారిత టీ20 టోర్నమెంట్లలో పాల్గొంటున్నాడు.

ప్రస్తుతం వీరి మధ్య ఉద్రిక్తతలు ఉన్నప్పటికీ, ఐపీఎల్ చరిత్రలోనే అత్యంత ప్రభావవంతమైన ఆటగాడిగా వార్నర్ ప్రయాణం నిలిచిపోతుంది. 2014లో హైదరాబాద్ జట్టులో చేరిన వార్నర్ చాలా త్వరగానే ఆ జట్టు బ్యాటింగ్ విభాగానికి వెన్నెముకగా మారాడు. ఆ మరుసటి సంవత్సరమే జట్టు కెప్టెన్సీ బాధ్యతలను కూడా అందుకున్నాడు.

వార్నర్ నాయకత్వంలోనే సన్‌రైజర్స్ హైదరాబాద్ 2016లో తమ తొలి ఐపీఎల్ ట్రోఫీని ముద్దాడింది. ఆ సీజన్ అంతటా ఈ లెఫ్ట్ హ్యాండ్ బ్యాటర్ కీలక పాత్ర పోషించాడు. పటిష్ఠమైన బౌలింగ్ ప్రదర్శనలు, టాప్ ఆర్డర్‌లో వార్నర్ స్థిరమైన ఆటతీరుపైనే పూర్తిగా ఆధారపడిన ఆ జట్టును ముందుండి నడిపిస్తూ, ఆ టోర్నమెంట్‌లో అత్యధిక పరుగులు చేసిన టాప్ బ్యాటర్లలో ఒకరిగా నిలిచాడు.

వార్నర్ కూడా ఫ్రాంచైజీతో ఉన్న సమయంలో అద్భుతమైన వ్యక్తిగత విజయాలను సొంతం చేసుకున్నాడు. 2015, 2017, 2019 సంవత్సరాల్లో 'ఆరెంజ్ క్యాప్' గెలుచుకున్నాడు. ఐపీఎల్‌లో ఆడిన అత్యంత విజయవంతమైన విదేశీ బ్యాటర్లలో ఒకరిగా ఉన్న వార్నర్.. ఇప్పటికీ హైదరాబాద్ తరఫున అత్యధిక పరుగులు చేసిన ఆటగాళ్ల జాబితాలో కొనసాగుతున్నాడు. సన్‌రైజర్స్ తరఫున ఆడిన 95 మ్యాచ్‌ల్లో 49.56 సగటుతో 4014 పరుగులు చేశారు. ఇందులో రెండు సెంచరీలు, 40 హాఫ్ సెంచరీలు ఉన్నాయి. తన ఆటతోనే కాకుండా, తెలుగు సినిమా రీల్స్ చేస్తూ 'ఆరెంజ్ ఆర్మీ' అభిమానులకు ఆయన ఓ ఆరాధ్య హీరోగా మారిపోయాడు.

అయితే, 2021 సీజన్ సమయంలో వార్నర్, ఫ్రాంచైజీల మధ్య బంధం అనూహ్య మలుపు తిరిగింది. ఫామ్ లేమి, వరుస ఓటముల కారణంగా సీజన్ మధ్యలోనే మేనేజ్‌మెంట్ ఆయనను కెప్టెన్సీ బాధ్యతల నుంచి తప్పించింది.

ఆ తర్వాత సీజన్‌లో వార్నర్‌ను ప్లేయింగ్ ఎలెవన్ (జట్టు) నుండి కూడా తొలగించడంతో పరిస్థితి మరింత దిగజారింది. యూఏఈలో జరిగిన టోర్నమెంట్ మ్యాచ్‌ల సమయంలో ఆయన డగౌట్‌లో కాకుండా, స్టేడియం స్టాండ్స్‌లో ఒంటరిగా కూర్చొని కనిపించడం ఆటగాడికి, ఫ్రాంచైజీకి మధ్య పెరుగుతున్న దూరాన్ని స్పష్టం చేసింది. చివరికి 2022 మెగా వేలానికి ముందే సన్‌రైజర్స్ జట్టు వార్నర్‌ను విడుదల చేయడంతో ఈ అధ్యాయం ముగిసింది.

ఆ తర్వాత, 2023 డిసెంబర్‌లో వార్నర్ మొదటిసారి ఒక విషయాన్ని బయటపెట్టారు. సన్‌రైజర్స్ హైదరాబాద్ జట్టులో భారీ కాంట్రాక్టులు దక్కించుకున్న పాట్ కమిన్స్, ట్రావిస్ హెడ్‌లకు అభినందనలు తెలపడానికి ప్రయత్నించినప్పుడు.. ఎస్‌ఆర్‌హెచ్ ఫ్రాంచైజీ తనను బ్లాక్ చేసిందని వార్నర్ అప్పట్లోనే వెల్లడించాడు.